Delhi, Jymmang:
Uwei na ki professor jong ka skulbah Jawaharlal Nehru University (JNU), New Delhi ha ki khyndiat sngi kiba la dep u la kynthoh ba dei ki kynhun khaïi drok kiba trei kam ha ka jylla Manipur kiba la don bynta ban wanrah ïa ki jingïakajia bad jingïaumsnam ba jur ha ka jylla Manipur kiba la jia ha ki khyndiat sngi kiba la leit noh.
Na ka liang u Professor Bhagat Oinam u la kynnoh ba ki jingïakajia bad jingïaumsnam kiba la jia ha ka jylla Manipur naduh ka 3 tarik mynta u bnai ka dei ka kam kaba la beaiñ kaba la pynkhreh janai da kitei ki kynhun khaïi droks.
Ïa katei, u Professor Oinam u la pyntip ha ka jingïalang bad ki lad pathai khubor ha New Delhi ïa kaba la pynlong da ka People’s Alliance for Peace and Progress Manipur bad ka Delhi Manipuri Society.
Ha katei ka jingïalang, na ka liang u Prof. Oinam u la ong ba ka sorkar BJP ha ka jylla Manipur ha ki bnai kiba la dep ka la shim da ki sienjam kiba tyngeh ban ïakhun pyrshah ïa ki kynhun khaïi drok kiba trei kam ha ka jylla. U la ong ba dei na katei ka daw ba ki kynhun khaïi drok ki la don bynta ban wanrah ïa kitei ki jingïakajia bad jingïaumsnam ha ka jylla.
Ha ka jingïalang u la ong shuh shuh ba ki paid Kuki ki tieng har har lada ka sorkar kan ai ïa ka kyrdan Schedule Tribe ïa ki paid Meitei, namar kan ktah ïa ka lad ïoh kam ïoh jam jong ki. U la kynnoh ba katei ka dei sa kawei ka daw kaba la wanrah ïa ki jingïakajia ha ka jylla.
U Prof. Oinam u la kynnoh shuh shuh ba ki don bun ki paid Kuki kiba shong ba sah ha Manipur hynrei kiba dei trai pat na ka ri Myanmar, kiba la ïoh ïa ki kam ki jam ha ki tnat sorkar bapher bapher jong ka Sorkar Pdeng.
Halor ki jingïakajia bad jingïaumsnam kiba la jia ha ka jylla Manipur, dang ha ki khyndiat sngi kiba la leit noh na ka liang u Myntri Rangbah jong ka jylla – N Biren Singh u la pyntip ba ki la don haduh 60 ngut ki briew kiba la khlad bad 231 ngut kiwei pat kiba la ïoh ïa ki jingmynsaw.
U la pyntip shuh shuh ba ki la don palat 1,700 tylli ki ïing briew ha kylleng ki jylla kiba la shah wiang ding bad shah pynjulor naduh ka 3 tarik mynta u bnai.
Na ka liang u Myntri Rangbah u la pyntip shuh shuh ba ka sorkar jylla kan thaw da ka kynhun kaba kyrpang ka ban tohkit halor katei ka jingjia kaba la ktah jur ïa ka shong suk shong saiñ, ka trei ka ktah jong ki nongshong shnong ka jylla.
