New Delhi, Jymmang:
Ha ka thup kyrdan ba thymmai ba la pynmih da ka ICC ha kaba iadei bad ki kynhun ialehkai ODIs, ka khubor ka iathuh ba ka kynhun ialehkai jong ki shynrang ka ri (India) ka lah shah pynhiar mynta sha ka kyrdan balai, kata hadien ka Pakistan bad ka jingduna da lai dor-thong na ka kynhun ialehkai ka Australia kaba dang iai bat ia ka kyrdan ba nyngkong ha ka pyrthei.
Nangta katkum ka khubor ka iathuh ruh ba ka Australia kaba long ka kynhun lahduh haduh san sien ha ka pyrthei ka lah nang iai pynjanai shuh shuh ia ka jingkyntiew dor-thong na ka 113 sha ka 118 hadien ka jingpynthymmai kyrdan ba shisien shi snem, kata da kaba iai bat halade ia ka kyrdan bad ka jinglah ban iai tam ia ka Pakistan (116 dor-thong) bad kumjuh ruh ia ka India (115 dor-thong).
Katkum ka jingpyllait khubor da ka ICC, ka iathuh ba ha shuwa ban wanrah ia ka jingpynthymmai kyrdan ba shi snem, ka Australia ka shong ha ka kyrdan ba hajrongeh da ki 113 dor-thong lem bad ka India hadien jong ka kaba duna da tang khyndiat dor-thong na ka bynta ban knieh noh ia katei ka kyrdan na ka Australia.
Shuh shuh ruh ka Pakistan ka lah wan ha ka kyrdan balai da 112 dor-thong bad tang khyndiat por ka lah wan ha ka kyrdan ba hajrong hadien ka jingjop ha ka jing-iakhun ODIs kaba saw pyrshah ia ka New Zealand dang ha une u bnai ba mynta. Kumta ruh ka Pakistan ka lah dep ban iaisah ha katei ka kyrdan lada katei ka kynhun ka lah ban sar shalade ia ki 5-0 jingjop lynter ki jong ka pyrshah ia ka New Zealand.
Da tang lai jingkyntiew dor-thong, mynta lah pyniakhlad ia kitei ki kynhun ialehkai kiba wan ha ka thup kyrdan ba 3 bad kaba kham itynnad ha ka jingiaknieh ia katei ka kyrdan ba nyngkong kan long ka lympung ialehkai World Cup mynta u snem.
Ka jingpynthymmai kyrdan da ka ICC ka long na baroh ki jingialehkai ODIs ba ki kynhun ialehkai ki lah pyndep ha ka shi snem kata naduh u Jymmang 2020 ha ryngkat bad ki jingialehkai ba lah pyndep pura ha shuwa u Jymmang 2022 kiba kit 50 % bad baroh-lin ki jingialehkai kiba khia-thew bad ba kit shaduh ka 100%.
Katei ka thew ruh ba ka Pakistan mynta ka lah ioh ban pynliem noh ia ka India na ka bynta ba kan ioh shong ha ka kyrdan ba-ar da ki 4-0 jingshah rem ha ka jngleit iakhun jong ka bad ka England ia kaba ym shym lah kheinlang shuh.
Kumta ki 3-0 jingshah rem ka Pakistan ha ka England ha u snem 2021 ki lah pynduna ruh ia ka jingkhia-thew jong ki jingialehkai jong ka bad kiba lah iarap ruh ia ka kynhun ban pynhiar kyrdan ia ka India ha ka thup.
Kumjuh ruh ka India ka lah mad ia ka jingeh kaba khraw ha kaba iadei bad ka jingpynneh jong ka ha ka kyrdan ba-ar hadien ka jingshah rem noh da 2-1 ha ki jingiakhun jong ka ha-iing pyrshah ia ka Australia ha une u snem ba mynta.
Napdeng kiwei pat ki kynhun ialehkai ha ka tei ka thup kyrdan ba thymmai, ka New Zealand mynta ka lah shah pynshong ha ka kyrdan ba 4 da ki 104 dor-thong ba ka lah khur ia kaba lah bud pat sa ka England kaba lah sakhi ia ka jingshah pynduna haduh 10 dor-thong ha ka jingkynrtiew dor-thong ka jong ka kata ha ka jak aba 5 da 101; katba ka Afghanistan mynta ka lah ioh ha ka ban kiew bun tylli ki jaka na ka bynta ban ioh shong ha ka kyrdan ba 8 bad tam ruh ia ka Sri Lanka kaba don ha ka kyrdan ba 9 bud sa ka West Indies ha ka kyrdan ba 10, ka South Africa ha ka kyrdan ba 6 bad ka Bangladesh ha ka kyrdan ba 7.
