Shillong, Jymmang 11:
Ka Shillong Lajong FC ka la ïasam mar shi dor-thong (point) ha ka jingïalehkai jong ka wat kaba khatduh ha ka Second Division League hadien ba ïakhaid khlem don ba thep kol pyrshah ïa ka Delhi FC ha ka Sngi Palei.
Ha kane ka jingïakhun kaba nyngkong ba long shabar na la ïing ha Minerva Sports Complex kaba ha Chandigarh, kine ki kynhun ki la ïakhun tyngeh naduh kaba sdang, hynrei kim shym la lah ban thep kol haduh ba wai jong ka jingïakhun.
Haba phai sha kawei pat ka jingïakhun kaba la long ha madan Cooperage kaba ha Mumbai, ka Ambernath United ka la pynliem noh ïa ka Bengaluru United lyngba ka shi kol ba la thep da u Abhijit Tawhare (82) na ka bynta ban khur ïa ka jingjop kaba nyngkong ha kane ka lympung.
Kumba ka long mynta, ka Lajong, Ambernath United bad ka Bengaluru ki la kamai mar 3 dor-thong na ki ar sien ïakhun.
Kumta ka Lajong ka donkam ban ïakhun tyngeh ha ka jingïakhun ba lai jong kane ka lympung pyrshah ïa ka Ambernath United ka ban long ha ka 16 tarik ha Mumbai khnang ba kan nangjam shaphrang ha kam ïalehkai bad ruh ban pynthikna ban ïoh rung sha ka I-League.
