Tura, Jymmang 11:
Uwei u samla na ka shnong Dangsubil kaba hap ha Dimapara, South Garo Hills, bad uba la leit sha Tamil Nadu ban trei ban ktah bad kawei ka kompani, u la jah rngai naduh ka taïew ba la dep.
Utei u samla uba la jah rngai u dei uba la tip kyrteng kum u Mimu T. Sangma bad ha ka 1 tarik Jymmang, u la leit na Paikan kaba don ha Assam sha Tamil Nadu ryngkat bad uwei u briew u bym lah satia ban tip kyrteng. Katkum ki khubor, u Mimu la leit ban trei na ka bynta kawei ka kompani ba la tip kum ka Vertex Company kaba don ha ka shnong Mosur ha Tamil Nadu.
U Mimu u dei u khun jong u Nidol R. Marak bad ka (L) Sonila T. Sangma. Na ka liang ki bahaïing hasem ki la leit rah da ka jingthoh sha ki pulit ka Dimapara Infiltration Check Post ha ka 9 tarik Jymmang ban pyntip halor ka jingjah rngai jong utei u samla. La kyrpad ruh ïa u Myntri Rangbah, u Conrad K Sangma, ba un ïakren bad u Myntri Rangbah ka Tamil Nadu khnang ba utei u samla un ïoh ban wanphai noh sha la ïing hapdeng ka jingshngaiñ.
Ha kawei pat ka liang, ka seng ADE na Gasuapara ka la kyntu ïa ki samla jong ka thaiñ ban kiar na ka jingleit trei sha kiwei pat ki bynta jong ka Ri khlem da peit bad pynthikna shwa.
