Amritsar, Jymmang:
Ki la don kumba san ngut ki briew kiba la shahkem ha ki pulit jong ka Punjab hadien ba ka la don ka jingbthei bom ha Golden Temple kaba ha Amritsar ha ka step jong ka sngi Palei.
Ka la don ka jingbthei jong u bom Low-Intensity kaba la jia ha ka por 1 baje mynstep jong katei ka sngi Palei hajan Heritage Street kaba don ha Amritsar.
Kane ka dei ka jingjia kaba la jia ha ka sien kaba lai ha ki san sngi. “Ka jingjia jong ka jingbthei u bom Low-Intensity ka dei kaba la lap ïa ka jingshisha,” la ong u Director General jong ki pulit ka Punjab.
Ka jingjia jong ka jingbthei bom kaba nyngkong ka la jia ha ka 6 tarik, Jymmang bad kaba ar ka la jia ha ka lah sngi U Blei ka 8 tarik, Jymmang.
Ka jaka ba la jia ka jingbthei bom ha kane ka sien kaba mynta, ka la jia ha ka jaka kaba jngai kumba 2 km na Heritage Street hajan Golden Temple, kaba dei ka jaka jngohkai kaba paw ha ka nongbah.
Ka kynhun National Investigation Agency (NIA) bad ki pulit jong ka Punjab ki la lum ïa ki sabut na katei ka jaka ba la jia ka jingbthei bom.
Ka kynhun Special Investigation Team (SIT) kan sa tohkit bniah halor ka jingjia bad kan sa pyrshang ban wad ïa ki daw tynrai halor kane ka jingshah pynbthei bom, la ïathuh ki pulit.
Katkum ka kaiphot ba la ïohlum hashwa, la ong ba ym shym don kino kino ki jait tiar pynbthei bom ban lap ba la pyndonkam ha kane ka jingpynbthei, la ïathuh ka tyllong khubor, ha kaba la ong ba ïa ki tiar pynbthei bom ha ki ar tylli ki jaka ha Heritage Street ha Amritsar la song ha ki tyndong ba ju thep ïa ki jingdih pynkhlaiñ.
Uwei u briew u la mynsaw ha ka por ba la jia ka jingbthei bom ha ka lah sngi U Blei.
Ym shym lap ba don ki tiar pynbthei bom, bad ki pulit ki la ong ba kumba la khmih bniah ka la paw ba ïa u bom la buh ha ki jingbuh jingdih.
Ki pulit ki la ïathuh shuh shuh ba ïa ki bom pynbthei la pyndonkam beit beit mar ïadep shna hynrei ki bym don ïa ki tiar kiba nep.
Ki la don ruh ki jingjulor ha kaba katto katne tylli ki ïit jong ki katto katne tylli ki ïing kiba la pait ha ka sngi ba la jia ka jingbhtei bom ha ka 6 tarik, Jymmang.
