Ngi sngew dei ban ai ka jingïaroh kaba khraw ïa ki nongthep ‘vote’ ka Sohïong konstitwensi kiba la ïa mih paidbah ryntih ban jied ïa u nongthaw aiñ bathymmai. Haduh 91.92 per cent (kaba long kumba 31 hajar ngut tam) na ka 34,783 ngut ki nongthep ‘vote’ ki la pyndep ïa la ka kamram kaba shisien ha ka san snem. Lada ïanujor bad ki 59 tylli ki konstitwensi kiba la dep thep ‘vote’ ha ka 27 tarik Rymphang, ka Sohïong ka wan ha ki kyrdan ba kham shakhmat ryngkat bad ki katto katne tylli kiwei pat ki konstitwensi kiba ki paidbah ki la ïa tuid sha ki ‘Polling Station’ ban pyndonkam ïa ka iktiar ban jied ïa u dkhot ka Ïingdorbar Thawaiñ. Wat la kane ka la ilekshon ka la long kaba khluit ha ka jingïatai lyngba ki rynsan jingïalang, hynrei kam shym la don pat kano-kano ka jingjia kaba la pynthut ïa ka shongsuk shongsaiñ lane kaba la wanrah ïa ka jingmynsaw ïano-ïano.
Ha ka Sngi Saitjaiñ ngin sa tip ïa ka kyrteng jong u MLA bathymmai ka Sohïong napdeng ki hynriew ngut ki kyrtong kiba la ïakhun ba kynthup ïa u Bah Samlin Malngiang na ka NPP, u Bah Synshar Lyngdoh na ka UDP, u Bah S Osborne Kharjana na ka Congress, u Bah Sandondor Ryntathiang na ka HSPDP, Bah Stodingstar Thabah na ka TMC bad u Bah Serap Eric Kharbuki na ka BJP. Hynrei kumba la ïohi bad ïohsngew, ka jingïakhun ka kham ïa thaiñ bha hapdeng u kyrtong ka NPP bad u kyrtong ka UDP. Tangba ngim lah pat ban tip ïa ka jingmut jong ki paidbah nongthep ‘vote’. Ym don ba lah ban batai stad lypa mano u ban jop namar ki kham stad ki paidbah kiba jied ban ïa kiba ïakhun ha kano-kano ka ilekshon. Ki kham sngewthuh ki paidbah ïano ki kham donkam ban long u MLA jong ki. Kiba shu peitkai nabar kin hap ban ïa ap shitom haduh ka Sngi Saitjaiñ ynda la khyllie ïa ki kor thep ‘vote’ ha State Central Library, Shillong. Ngi tharai ki paidbah ka Sohïong ki la sngewkmen ba ki la lah ban pyndep ïa la ka kamram hadien ba ki la ap la jan lai bnai duna ban ïoh thep ‘vote’. Ki ruh kin ïa ap beit kmang mano u ban jop napdeng ki hynriew ngut da ka jingkhmih lynti ba uta u ban jop un ai ïa ka jingshakri kaba paka tam ha ki liang bapher-bapher.
Ha ka por ïalap ilekshon, na ka liang ki nongïalam ka NPP bad UDP, kiba dei ruh ki MLA, ki la ïa kawang ktieh haduh ba don kiba ong ba yn pynïaid noh da ka kjat ïa ki MLA ka UDP hadien ba la dep ban pynhiar ïa ki nalor bos. Lada ka NPP kan jop ha Sohïong, khlem pep kan nang khlaiñ bad kan nang kiew ka jingsarong bad ka jingkob. Kan ym salia shuh ban weng ïa ki 11 ngut ki MLA ka UDP na ka sorkar namar kam donkam shuh ïa ki. Wat mynta ruh, ka NPP kam donkam eiei ïa kine ki 11 ngut bad ki la shu pynkhapngiah kai ïa ka Secretariat. Ka NPP ruh kam lah ban leh kham bha ïa la ki jong ki MLA na ka daw jong ka jingdon jong kine ki 11 ngut naba kan hap ban sam lem ïa ki kam ki jam sha kine ki MLA. Ha kajuh ka por, ngi sngewthuh ba ka sorkar kaba khlaiñ kan ym kwah ïa ka liang pyrshah kaba khlaiñ. Lehse ha kaba kut, ka NPP kan pynshong beit ïa ki 11 ngut ki MLA ka UDP ha tnum bos tang ban tlot ka liang pyrshah.
Mynta, ngi la ïohsngew na ki katto katne ngut ki nongïalam ka NPP bad UDP kiba la ong ba ka jingmih na ka ilekshon Sohïong kan ym pynthud eiei ïa ka jingïadei hapdeng kine ki seng bad ka jingïatreilang ka jong ki ha ka sorkar MDA 2.0. Kane hi ka la dei ka dak ka shin ba ïa mynta, ka NPP kan ym pat leh eiei ïa ka UDP bad kan nang pynshong shwa kumto. Lehse, ka NPP ka ap ïa ka sngi ba ka UDP kan pait arliang bad ba kita ki MLA ki ban mih kin leit pynïasoh noh sha ka seng kumba la jia bad ka PDF ha kaba baroh arngut ki MLA ki la rung sha ka NPP. Ngim lah ban tip kaei ka ban jia ha ka saiñpyrthei kaba kylla tang hapoh shi khyllipmat khamtam kum ha kane ka jylla jong ngi. Ka NPP kan kmen palat lada don ki MLA ka UDP kiba pynpait ïa kane ka seng bad ban long noh ki dkhot jong ka. Ha kata ka por, ïa ka sorkar yn ym lah shuh ban pynkhih tangba ka lah ban don pat ka jingïaknieh ban long nongïalam lane Myntri Rangbah kumba ngi la ïohi ha ka por ba dang khlaiñ bha ka seng Congress. Ynda la ïa bun palat ha kajuh ka sem, ki jingeh ki mih beit khamtam kum ha kane ka jylla ba la bun palat ki nongïalam katba ki nongbud ngim da tip thikna satia katno ki don.
