United Kingdom, Jymmang:
U nongpynmareh kali ba paw ka India u Ruhaan Alva u lah khur mynta ia ka sien kaba lai ha ka jingioh ban kiew ha ka rynsan deng takma ha ka GB4 single-Seater Championship kaba dang shu dep shen ha kine ki sngi. Ha katei ka lympung utei u rangialehkai u la lah ban pyndep ia ka jingiaid lynti da kaba wan ha ka kyrdan ba-ar ha ka kylla iakhun ba ar ha ka madan pynmareh kali ba pawnam bha ka ri Bilat ka Silverstone Race Circuit.
Utei u rang-ialehkai ka ri uba dang ha ka rta ba 16 snem uba long ruh u shi bynta jong ka JK Tyre Scholarship Programme kaba don ia ka thong na ka bynta ban ai sha ki nongialehkai pynmareh kali ba dang khynnah ka ri ia ka rynsan ha kaba kin lah ban pynseisoh ia ka kam ialehkai jong ki ha ki rynsan iakhun Shabar. Kumta ha ka ta ka jingiakhun, utei u rangialehkai u la lah ha ka ban tam noh shakhmat ia u lain ba khatduh duna da ki sekhon hadien u nongkhur ia ka nam lahduh na ka lympung u Harri Reynolds ia kaba lah bud nadien jong u da u Tom Mills kum uba lai. Ka jingkiew rynsan khur takma ba nyngkong ka jong u ha ka aiom ialehkai ba mynta ka long shisha kaba jop bad ka jingiai kyntiew shuh shuh ia ka jinglong ba skhem ka jong u na ka jingtrei shitom haduh ba un da lah ban khur ia ka jingjop.
Ka khubor ka iathuh ruh ba ka GB4 Championship lah plie paidbah ha bnai Nailur 2021 bad ha kaba katei ka lympung ialehkai mynta ka don ha ka aiom ialehkai kaba ar bad kaba pyndonkam ruh da ki kali Tatuus F4-T014 kiba long ki kali ia kaba lah pyndonkam ha ka ban shimbynta ha ki lympung iakob pynmareh kali ha Italy, ADAC bad Spanish F4 series.
