Kurup ka kynhun ED ïa ki jingdon  jingem ba T. 51 klur

Raipur, Jymmang:

Ka kynhun Enforcement Directorate (ED) ka la kurup noh ïa ki 90 tylli ki jingdon jingem kiba la kot sha ka T. 51.40 klur kiba dei jong ki MLA ka seng Congress, ki IAS Officer bad ki heh spah kiba don ka jingïadei bad u heh spah uba ju khaïi dewïong uba pawkhmat ïa uba la tip kyrteng kum u Suryakant Tiwari, la ïathuh ki heh ka kynhun ED ha ka sngi Ba-ar.

Ïa ki jingleit khynra la pynlong kum shi bynta ban tohkit bniah halor ka jingdon jong ka kam bamsap kaba la mih na ka kam beaiñ kaba la mih na ka rukom siew khajna ha Chhattisgarh.

U IAS Officer Ranu Sahu, ki MLA jong ka seng Congress u Devender Yadav bad Chandradev Prasad Rai, bad kiwei pat,  kynthup u RP Singh, Vinod Tiwari bad Ram Gopal Agarwal, ki la paw kyrteng ha ka jingmudui ha ryngkat u Suryakant Tiwari.

Ki jingdon jingem kiba la shah kurup ki kynthup ïa ki tiar ki bym lah ban pynkhih, ki kali ba rem dor, ki jingdeng ksiar bad ka pisa.

Ha ka por ba la pynlong ïa ka jingtohkit, ki heh jong ka kynhun ED ki la pynmih ka hukum ba la dei ban don ka jingtohkit ban pynshisha halor ka jingdonkit ha ka kam klop tyngka jong kine ki briew bad u Suryakant Tiwari.

Ka jingkhynra ka la long namar ka jingdon jong ka kam bamsap kaba jur ha kaba ka la don ka jinglum khajna kaba beaiñ kaba long T. 25 kaba la dawa ban siew na man ka 1 tonne u dewïong ba la kit ha Chhattisgarh.

Kane ka jingjia ka don bynta bad ki seng saiñ pyrthei ha kaba ka jingleit khynra ka la long ruh sha ki riewsaiñ pyrthei kiba na ka seng Congress, ki heh sorkar, ki heh spah bad ki riewpaidbah ha ka jylla, ha kaba kine baroh ki dei ki nongïarap ba ïajan bad u Myntri Rangbah ka Chhattisgarh u Bhupesh Baghel.

Ha ka por ba la pynlong ïa ka jingleit khynra kaba lah dep hashwa, ka kynhun ED ka la kurup ïa ki jingdon jingem kiba la  kot sha ka T. 170 klur kiba dei jong u Suryakant Tiwari,  ha ryngkat u IAS Officer u Sameer Vishnoi, u Chhattisgarh Civil Service Officer u Saumya Chaurasia, bad u Sunil Agarwal napdeng kiwei pat.

Baroh ki jingdon jingem ba la ïoh ban kurup ha kaba ïadei bad kane kumba la antad ki la poi sha ka T. 221.5 klur ha ka por ba la pynlong ïa ka jingleit khynra sha ki 145 tylli ki jaka haduh mynta. 

Ki la don kumba 9 ngut kiba la shah kynnoh kiba la shahkem hapoh ka jingtreikam jong ka PMLA.

Kine baroh ki dang shah set phatok haduh mynta. Ka  jingtohkit ha kaba ïadei bad ka jingjia ka dang ïai bteng.