Guwahati, Jymmang:
Ki pulit ka Assam ha ka 10 tarik mynta u bnai ki la leit ban kem noh ïa uwei u rangbah na ka thaiñ Gohpur, Sonitpur District ïa uba la suba jur ba dei ma u uba la donkti ban pynïap ïa la ka jong ka lok.
U rangbah u ba la shah kem ha katei ka sngi u dei u ba la tip kyrteng kum u Kushal Saikia. Ka longkmie kaba la shah pyn-ïap ka dei kaba la tip kyrteng kum ka Urmila Saikia.
Kat kum ki jingïoh lum khubor la ïathuh ba dei ki bahaïing hasem jong katei ka longkmie kiba la leit ban ujor da ka FIR bad kynnoh ruh ba dei u Kushal u ba la donkti ban pynïap ïa ka Urmila. Hadien ka jingïoh ïa ka jingujor, na ka liang ki bor pulit ki la pyrung da ka mokotduma na ka bynta ban pynlong ïa ki jingtohkit kiba donkam.
Kat kum ki jingïoh lum jingtip la ïathuh ba hadien ka jingshah kem jong u Kushal Saikia, ïa la leit ban rah tian bishar hakhmat ka ïing kashari da ki bor pulit ka thaiñ Hawajan bad na ka liang ka ïing kashari ka la pynmih ïa ka rai ban u dei ban ngat hapoh ka ‘police custody’ na ka bynta 3 sngi na ka bynta ban pynlong ïa ki jingtohkit kiba janai. Katkum ki jingïoh lum khubor la ïoh jingtip ba ka Urmila ka la khlad noh hadien ka jingshah tied da u tyrnem na ki bynta jong ka khlieh. Ki bahaïing hasem jong katei ka longkmie ki la pynlong ruh da ka jingïakhih bad dawa ba dei ban pynlong da ka jingtohkit kaba bniah bad kumjuh ruh ban ai da ka jingpynshitom kaba tyngeh pyrshah ïa utei u runar u ba la donkti ban pynïap ïa ka bahaïing jong ki.
