Srinagar, Jymmang:
Ka kynhun National Investigation Agency (NIA) ha ka sngi Palei ka la pynlong ïa ka jingleit khynra sha ki 11 tylli ki jaka kiba don ha ka them Kashmir ha kaba ïadei bad ka jingïatreilang bad ka kynhun lehnoh Jamaat-e-Islami, bad ka jingdonkti ha ka jingbei tyngka ban pynjur ïa ki kam pyntriem.
Kumba la ïathuh bniah, la ong ba ki jingleit khynra ba la pynlong da ka kynhun NIA ki dei kiba la pynlong ha Budgam, Baramulla, Kupwara bad Pulwama.
Ha ka sngi Balang, ka kynhun NIA ka la kurup noh ïa ki jingdon jingem jong ki lai ngut ki briew halor ka jingshah kynnoh jong ki ba ki la donkti ban leh ïa ki kam ba ïadei bad ki lehnoh ha Kashmir, la ïathuh ki heh jong ka kynhun.
Ka kynhun tohkit ka la shim ïa ki sienjam ban ïakhun tyngeh pyrshah ïa ki kynhun lehnoh, ïa ki kynhun ba la ïatreilang bad ki, ki nongïarap bad ki nongkyrshan jong ki lehnoh da kaba pynlong ïa ki jingleit khynra ïa ki jingdon jingem ba la suba don jingïadei bad ki lehnoh bad kumjuh sha ki briew kiba la shah suba donkti bad ki lehnoh sha kylleng ki jaka kiba don ha Kashmir, ki la ong.
Ka kynhun NIA ka la kurup noh ïa ki jingdon jingem ki bym lah ban pynkhih jong ki lai ngut kiba la shah kynnoh ha ki ar tylli ki jingjia jong ka jingdon bynta jong ki ban leh ïa ki kam pyntriem bad ki dkhot jong ki kynhun lehnoh kum ka kynhun Hizbul Mujahideen (HM) bad Jaish-e-Mohammad (JeM), napdeng kiwei pat.
Ha ka jingjia kaba nyngkong, ïa ki jingdon jingem ki bym lah ban pynkhih jong ki arngut kiba la shah kynnoh, kiba kynthup ïa u Doulat Ali Mugal bad u Ishaq Pala la kurup noh ha Herman kaba don ha Shopian distrik hapoh ka jingtreikam jong ka UA(P)A Act, la ong ka kynhun NIA. Katba u Pala, uba la shah set patok ha Central Jail kaba ha Agra, u die u lehnoh jong ka kynhun HM/Al-Badr, u Mugal u la long u nongïarap jong ki lehnoh HM bad mynta u dang shah pyllait jamin, la ïathuh ka kynhun tohkit.
Ha ka sngi Balang, u Director General of Police (DGP) jong ka Jammu & Kashmir u Dilbag Singh ha ka jingïakren bad ki nongthoh khubor u la ong ba kine ki kynhun ki la don bynta ban leh ïa ki kam pyntriem ba la jia ha ki ar tylli ki distrik kiba don ha ki bynta khappud kiba kynthup ha Rajouri bad Poonch ha kaba shen kin sa shah pynduh pyndam noh.
U la ong ba ka jingthmu kaba thymmai mynta ka long ban leh ei ei ha Doda, Kishtwar bad Ramban distrik khnang ban lah ban pynkhlaiñ ïa ki bor pahara bad ban buh jingshngaiñ ha ka thaiñ.
Ki arngut ki lehnoh kiba la thombor ïa ki shipai ha Poonch bad Rajouri distrik ha ka 20 tarik, Ïaïong bad ka 5 tarik, Jymmang ki la shim ïa ka jingim jong ki san ngut ki shipai.
“Ka long kaba eh ban batai halor kane ba la ka dei na ka jingwan rungtuh jong ki lehnoh bar ri kaba dang shen ne kaba la kham mynshwa. Hynrei ki kynhun lehnoh kiba na Pakistan ki ju wan rung tuh sha ki bynta jong kane ka ri ha ryngkat ki tiar siat bad ki tiar pynbthei halor kajingthmu ban hiar thma pyrshah ïa ka ri. Khnang ban lah ban pynïap hadien ba la ithuh ïa ki, ki shipai bad ki pulit ki la ïatreilang,” la ong u DGP.
“Ha kiba bun ki jaka, ki la ithuh bad kine ki la shah pynïap. Ki kynhun kiba dang sah kiba dang bteng ban leh ïa ki kam thombor shen kin sa sha pynduh pyndam”, la ong u Singh ha ka jingïakren bad ki nongthoh khubor, ha Jammu.
