Jowai, Jymmang 11:
Ka 7 Wasa United bad ka Rangdajied United ki long ba la pynkhreh na ka bynta ka jingïalehkai kaba nyngkong eh jong ka Jowai Zone ha ka lympung ïalehkai Meghalaya State League (MSL) ka ban long ha ka Sngi Thohdieng ha Kiang Nangbah Stadium kaba don ha Ladthadlaboh, Jowai.
Ïa kane ka lympung yn plie da u Myntri ka tnad Ïalehkai ka Sorkar Jylla, u Bah Shakliar Warjri kum u kongsan ha ryngkat ka jingdonlang u MLA ka Jowai, u Bah Wailadmiki Shylla kum u symbud kongsan ha ka por 2 baje noh phai sngi.
Ka 7 Wasa United ka dei ka lahduh ha ka MSL jong ka aïom 2017-18, katba ka Rangdajied United ka dei kaba wan ba-ar ha u 2019.
Ha ka Jowai Zone ki don hynñiew tylli ki kynhun; kita ka Niaw Wasa United, Rymbai Ïawpynsing SC, Mulait United FC, Seiñ Pynbhalang SC, Rangdajied United FC, Ladthadlaboh SC bad Youth Club Pdengkarong.
Haba ïakren bad ki nongthoh khubor, ki kapten bad ki manager jong ki ar tylli ki kynhun kiba kynthup ïa u kapten ka 7 Wasa United u Pynishai Lathong, Wansalan Pyrtuh (Manager) bad u kapten ka Rangdajied United u Ñiawkorlang Kyndiah bad Aibanjop Shadap (Manager) ki la pynpaw ba mar sien kut ka Shillong Premier League ki khmih lynti ba ka MSL kan sdang noh, hynrei na ka jingbunkam ka synjuk la pynslem noh ïa ka, wat la kata ki long ba la pynkhreh bha na bynta kane ka lympung.
Katba na ka liang u General Secretary ka WJDSA, u Bah Lammat O Laloo bad uba long ruh u Chairman ka Competition Committee, u la kyrpad ïa baroh 7 tylli ki kynhun ban bud ryntih ïa ki kyndon ba la pynkhreh da ka Organising Committee jong ka MSL bad ban wan biang por sha madan khnang ba ka jingïalehkai kan ïaid beit ïaid ryntih.
Na ka liang kitei ki kynhun ki la wer ïa ki paidbah ban wan sakhi ïa kane ka jingïalehkai bad ruh ban ai jingkyrshan khnang ba ki rangïalehkai kin lah ban ïalehkai bha. Kumba ka paw ka Niaw Wasa ka dei ka kynhun kaba na katei ka thaiñ. Kumta ka lah ban don bun ki paidbah nongkyrshan, katba ka Rangdajied pat ka don ïa bun ngut ki rangïalehkai kiba dei na katei ka thaiñ bad la khmih ba kin ïoh ka jingkyrshan lang na ki paidbah.
Ka Niaw Wasa ka dei ruh ka kynhun kaba la khur ïa ka nam lahduh ha ka Super Division Football League ba la pynïaid da ka West Jaiñtia District Sports Association ha ka aïom ba la dep. Ka la khur ruh ïa ka nam lahduh ha ka MSL 2018 hadien ba ka lah ban pynliem noh ïa ka Tynrongmawsaw lyngba ka tie-breaker ha Jowai.
Nalor kine, katei ka klob kaba na Jowai ka la khur ruh ïa ka nam lahduh kaba nyngkong eh ha ka Meghalaya State Futsal League ha u 2021 bad ka la ïoh ban leit ïashim bynta ruh sha ka National Futsal Club Championship.
Wat la kam shym la lah ban pynurlong ha u 2019, hynrei ka Niaw Wasa ka la khmih lynti ban ïalehkai bha mynta ka aïom.
Ha kawei pat ka liang, ka Rangdajied kaba la wan ha ka kyrdan ba-ar ha ka MSL 2019, hadien ba shah rem noh ha ka Shillong Lajong ha ka jingïakhun final kaba la long ha Khliehriat.
Wat la kam shym la lah ban kynjoh sha ka thong, hynrei mynta ka kynti ka khmih lynti ban ïalehkai bha na ka bynta ban khur syndon ïa ka nam lahduh.
Hadien kane ka sngi sdang ïa katei ka lympung, ïa kiwei pat ki jingïalehkai na ka bynta lai tylli ki zone; kita ka Tura (Chandmari Ground), Mawkyrwat (MDSA Ground) bad ka Shillong (Third Ground, Polo) kin sdang naduh ka Sngi Saitjaiñ.
