Shillong, Jymmang 11:
Ka Voice of the People Party (VPP) ha ka Sngi Palei ka la pyntip ba ha ka por 2 baje nohphai sngi jong ka Sngi Thohdieng, ki saw ngut ki MLA ka seng kin leit buh ïa ka jingdawa ha ka sorkar Meghalaya ba ka dei ban pynsangeh noh mardor ïa ka jingpynrung kam ha ki kam sorkar ha ka jylla khlem da peit bniah shwa ïa ka ‘Roster System’ bad ka jingbhah kam (Reservation Policy).
U nongaiktien ka VPP, u Dr Batskhem Myrboh, u la ong ba ki MLA jong ka VPP kin don ha ka jaka pynïeng kali (Parking Lot) hajan Additional Secretariat naduh ka por 1 baje nohphai sngi.
Kumta ka VPP ka la kyntu ïa ki paidbah kiba wan ba ki dei ban long kiba jai-jai bad ban ym leh ïa kino kino ki kam kiba pynthut ïa ka shongsuk shong shngaiñ bad lada don kum kita ki hap ban kit hi ïa ka jingkitkhlieh.
“Ka jingïaleh jong ngi kam dei ïa kano kano ka kynhun jaitbynriew, hynrei ka long beit ïa ka sorkar ba ka dei ban leh eiei halor ka jingeh ki khun samla ba mih na ka Roster System bad ka jingbhah kam,” la ong u Dr Myrboh.
