Shillong, Jymmang 11:
U President jong ka Meghalaya Film Makers Association kaba dei ka synjuk ki nongshna phlim, u Bah Commander Shangpliang u la ong ba ka jingjied ïa u ban leit mihkhmat ïa ka jylla sha ka 76 Annual Cannes Film Festival ka ban long ha ri France ka dei ka jingjied jong ka Sorkar India.
Kane ka jingpynpaw u Bah Commander ka dei hadien ba ki nongpynmih phim ki la pynkup burom ïa u mynta ka sngi ka 11 tarik Jymmang ha Youth Hostel, Shillong hadien ba ki sngewkmen ba ka sorkar India ka la jied ïa u ban mihkhmat ïa ka jylla Meghalaya sha kane ka tamasa pyni phlim kaba heh ha ka pyrthei ka ban sdang naduh ka 16 tarik haduh ka 27 tarik Jymmang, 2023.
U Bah Commander u la ïathuh hadien ba ka sorkar India lyngba ka Ministry of Information and Broadcasting ka la phah shithi sha ka sorkar jylla, ma u bad kiwei ki paralok ki la thoh shithi sha ka tnad shangkai pyrthei katba kiwei pat ki thoh shithi sha ka tnad Information & Public Relation. Hynrei, haba kine baroh ar tylli ki tnad jong ka sorkar jylla ki phah ïa ki kyrteng sha ka sorkar India bad dei ka sorkar India kaba jied tang ar ngut, kata ïa ka kyrteng jong u bad uwei pat ban leit mihkhmat ïa ka ri India sha ka Cannes Film Festival.
“Ngam lah ban pynbor ïa ka sorkar India ban jied ïa nga shaduh sha Cannes Film Festival, hynrei ki da bishar bniah shwa ba kin jied” u la ong.
Kumta u la kyntu ïa ki nongak phlim ba kin kiar ban ïa kynthoh namar kan sa poi ka por ba kiwei kin kynthoh ïa phi.
Shuh shuh u la ong ba kam mut tang kiba ïoh khusnam la ithuh ba ki dei ki nongshna phlim ne ki tyngshop ki puron, hynrei shisien ba phi la lah ban shna phlim, la lah ban ak phlim phi la dei hi ki nongshna phlim bad la ithuh ruh ïa phi kum ki tyngshop bad puron.
Nangta u la ong ruh ba ki phlim Khasi ki la noh synñiang shibun ïa ka sorkar da kaba siew khajna lyngba ka GST da ki phew lak ha ka shi snem.
Nalorkata, u la ong ba ka sorkar ka la ithuh ïa ka kam shna phlim hapoh ka jylla, hynrei haduh mynta ym pat tip kaei ka tnad kaba peit ïa ki kam shna phlim namar kaba pynmih ka jingkulmar ka dei namar ym don ïa ka tnad kaba kyrpang ban peit ïa ki kam shna phlim.
