Rome, Jymmang:
Ka long ka jingjop kaba khraw na ka bynta u nongialehkai Tennis ka ri Italy u Fabio Fognini ha ka lympung ialehkai ba long ha ka ri jong utei u rangialehkai namar u la khur ia ka jingjop kaba khraw jong ka aiom ialehkai ba mynta ha ka por ba u lah ban pynliem noh ia u nong-ialehkai na Bilat u Andy Murray ha ka lympung ialehkai ba mynta ka Internazionali d’Italia.
Ka khubor ka iathuh ba u Fognini uba long u nongialehkai ba lah rung teng sha ka thup ba 10, u lah hap ban iaid shibun ki jingeh mynta u snem bad poi ruh ha Foro Italico jong katei ka lympung ialehkai da ki 2-8 tour-level rekod ki jong u. Kumta ka jingioh rung jong utei u nongialehkai da ka ‘wild card’ na ka bynta katei ka lympung ialehkai, ka lah pynsngewbha ia ki paidbah nongpeitkai ka nongbah Rome, ha ka por ba u Fognini u la lah ban khur shalade ia ki 6-4, 4-6, 6-4 jingjop na ka bynta ban jam sha ka kyllai iakhun kaba ar jong ka lympung. Na ka bynta u Andy ka long ba utei u nongialehkai ba lah kham rim u lah rung sha ka jingialehkai ha ka jingiaphiah ka jong ki ia ki phra jingiakynduh ba nyngkong hapdeng ki arngut. Ka long ruh ka sien kaba nyngkong mynta ha ka jingiakynduh ka jong ki naduh u snem 2019 ha Shanghai; ha kaba u Fognini u lah rah ia ka set iakhun ba khatduh da ka tie-break. Ki arngut ki lah ioh ban ialehkai ruh ha Foro Italico ha u snem 2017 ha ka por ba u Murray u bat ia ka kyrdan ba nyngkong.
Hadien katei ka jingjop pyrshah ia u Murray, u Fognini un sa iakynduh pat bad u nongialehkai na ka ri Serbia u Miomir Kecmanovic. Ha kawei pat ka jngialehkai, u Arthur Fils na France u lah ioh ban khur ha ka sien kaba nynhkong ia ka jingshah pyniakab ka jong u ha ka ATP Masters 1000 da ka jingjop kaba u la lah ban khur ha ka por ba u lah pynliem noh ia u Juan Manuel Cerundolo na Argentina da 6-1, 1-6, 6-4. Hadien katei ka jingjop, u Fils un sa mad ruh ia ka jingiakhun kaba kham jwat bad kham-eh ha ka jingiakhun pyrshah bad u Holger Rune.
