Shillong, Jymmang 11:
Ka sorkar jylla ka la ïoh jingïaroh na ka Meghalaya High Court ha ka Sngi Palei halor ka jingthmu ban sdang pynïaid noh da ki bos na ka bynta ban leit on bad leit shaw ïa ki khynnah skul ha kane ka nongbah.
Ha kane ka sngi, ka sorkar ka la pyntip ba ka jingpyndonkam da ki bos ka long kum shi bynta ban pynthikna ba ki paidbah kin ym rah da ki kali shimet ban leit on bad leit shaw ïa ki khynnah na ki skul.
Ha kajuh ka por, wat la ki don ki bos na ka bynta ki khynnah, hynrei ki kmie ki kpa ki la pynpaw ïa ka jingsngewkhia ha kaba ïadei bad ka jinglong shngaiñ jong ki khynnah khamtam ki khynnah kynthei bad namarkata kim kwah ban pyndonkam da ki kali paidbah wat la ka buh jingeh/jingthut ïa ki ha ka jingleit on leit shaw.
Hynrei, ki lad pathai khubor, bad kumjuh ruh na ka liang u muktiar ka sorkar, ki la dep pynpaw ba ha ki bos ban leit on bad leit shaw ïa ki khynnah, yn pyndait da ki kor CCTV bad ka don ruh ka Mobile App ban ai sha ki kmie ki kpa khnang ba na kane ka App kin tip shaei ka bos ka ïaid bad katno por kan poi bad kaei kaba jia ha kita ki bos.
Kane ka rukom pyntreikam ïa ki bos skul ïa kaba la tip kum kata ka ‘Real-Time Passenger Information System’ ka long kaei-kaei ka ban pynkut noh ïa kino-kino ki jingsngew khohñioh jong ki kmie ki kpa ha kaba ïadei bad ka jinglong shngaiñ jong ki khynnah kiba shong ha kita ki bos.
Shuh shuh ka High Court ka la ong ba dang donkam shuh ban shim sa ïa kiwei pat ki sienjam ban pynduna ïa ka jingkhapngiah jong ki surok la ka dei ka jingshna surok ne jaka pynïeng kali ne ban pynlong ïa ki surok ban ïaid tang shiliang lane kiwei pat.
Nalorkata, ka la ong ba lada lah ban pynurlong ïa ka surok ‘Flyover’ kaba na Rilbong sha Jhalupara, ka jingdheng kali kan duna. Ka la ong ba ka sorkar ka dei ban bteng ban leh ïa kine ki kam ba bha.
