Jowai, Jymmang 11:
Ka jingïakynad khappud ha ka thaiñ Khanduli kaba don ha West Jaiñtia Hills District ka la thnam bha ha ka Sngi Palei haduh ba ki paidbhur na ka jaitbynriew Karbi ki la pynjulor ïa ka kali ba pyndonkam da u Superintendent of Police (SP) ka West Jaiñtia Hills, u Bah Chemphang Syrti, hadien ba uwei u briew uba dei u Karbi u la mynsaw na ka jingshah shoh ha ki nongshong shnong ka Khanduli.
Haba ïakren bad u Bah Yooshida Nongspung, Waheh Chnong ka Khanduli, u la ïathuh ba ha ka por nohphai sngi, phra ngut ki briew kiba dei ki Karbi ki la leit byrngem byrsit ïa uwei u nongshong shnong ka Khanduli ha ka lyngkha jong u kaba dang hap hapoh u pud u sam ka shnong Khanduli.
Utei u nongrep u la ïoh phet bad u la pyntip sha kiwei ki nongshong shnong lyngba ka ‘phone’ halor kata ka jingshah byrngem jong u. La kynnoh ruh ba kitei ki phra ngut ki la thang noh ïa artylli ki ïing trep kiba don ha katei ka lyngkha. Hadien ba la dep thang, kitei ki briew kiba dei ki Karbi lem bad kiwei pat ki la beh thong ïa uta u nongrep.
U Bah Nongspung u la ong ba tangba uta u nongrep u la ïakynduh noh ïa kiwei pat ki para nongshong shnong bad ki la beh kylla ïa kitei ki briew kiba dei ki Karbi, bad ki Karbi ki la phet krad kylla. Hynrei, u la ïathuh ba uwei u Karbi u la ngat noh ha ka jingshah shoh shah dat ha ki nongshong shnong ka Khanduli kiba la bitar halor ka jingleh ki Karbi. Uta uba la shah shoh u la mynsaw malu-mala na ka bynta jong ka khlieh, la ong u Bah Nongspung.
Ha kane ka sngi, u Waheh Chnong u la ong ba ka Dorbar Shnong Khanduli ka la lum ïa ka dorbar ban ïakren halor katei ka jingjia ha kaba la don ryngkat u Bah Syrti lem bad ki nongïalam shnong. Ha kata ka jingïalang, la mynjur ban pynneh ïa ka shongsuk shongsaiñ.
Hynrei, u Bah Nongspung u la ong ba ki Karbi kiba la bitar halor ka jingshah shoh uwei na ki, ki la thmu ban hiar sha Khanduli tangba la pakhang lynti noh ïa ki da ki pulit Assam kiba ap pahara ha Khanduli.
Mar ïa ïoh jingtip halor katei ka jinghiar ki nong Karbi, u SP ka West Jaiñtia Hills ruh u la leit sha ka jaka ba don ki pulit Assam.
Ka tyllong khubor ka ïathuh ba u SP u la leit da ka kali Scorpio, bad kata ka kali ka la shah lun maw, bad shah pom da ka wait bad ka la julor. Hynrei, kam shym la don kano-kano ka jingjia ïa u Bah Syrti lane ki nongbud jong u.
Haduh ba thoh ïa kane ka khubor, ka jinglong jingman ka la jai-jai bad ki pulit na baroh ar jylla, kata Assam bad Meghalaya, ki la tem ïa ka jingïakynad.
