Shillong, Jymmang 11:
U Myntri Rangbah barim ka Jylla, u Dr Mukul Sangma, bad uba dei ruh u Nongïalam ka AITC, ha ka sngi Palei u la ther bad thalaiñ tyngeh ïa ka Sorkar MDA-2 ba lamkhmat da ka NPP na ka bynta ka jingpynmih ïa ka byrta ne ‘notification’ kaba ïadei bad ka jingai jingmynjur ïa ka laisen tih mawpoh khyndew bad ka ‘mining lease’ kaba wat ban pynduhlad ïa ki paidbah, khamtam ïa ki nongtih dewïong ka jylla.
Katkum ka jingpynpaw ka jong u, lyngba kum kane ka byrta (notification), ka paw ba ka sorkar ka kwah ban jop ha ka kam tih beaiñ.
Haba kren sha ki katto katne ki nongthoh khubor, u Dr Mukul u la ong ba ka Sorkar ha u snem 2012, ka la wanrah ïa ka policy kata ka ‘Meghalaya Mineral Development and Regulation Policy, 2012’ kaba la kdew ba ki trai par kiba don ka jaka ba heh 5 hectare ki lah ban ïaid shakhmat ban ïoh ïa ka mining lease.
“Hynrei kaei kaba jia mynta? Mynta, kane ka sorkar ka la pynmih ka jingpynbna ïa kaba la shna bad pynwandur ban pynduhlad ïa ki briew jong ngi. Ma ngi baroh ki tip ïa ki briew jong ngi, ki kur jong ngi ki la dep ban sam ïa kine baroh ki par sha ki longïing bapher bapher bad ruh sha ki nongïoh jingmyntoi bapher bapher kiba hap ha kito ki Elaka lane ki Hima lane ha ki jaka jong ki Akhing. Mynta, ngi tip ba haba la don ka jingsam bhah, kin don kiba ïoh 5 hectare bad kin don ruh kiba don 20 hectare,” la ong u Dr Mukul.
“Baroh ngi tip ïa kane, hynrei balei pat ka sorkar ka pyrshang ban wanrah ki sohkyrdot bad ki jingeh ban khanglad ïa ka kabu kaba don na ka bynta ki briew jong ngi da kaba wanrah ïa kum kine ki jingpyrkhing kaba ong ba ka jaka ba rit eh ban aplai ïa ka mining lease lane ban tih da ka aiñ donkam ban don la kumno kumno ka jaka kaba 100 hectare.” Dei kane kaei kaba nga buh jingkylli,” la ong u Dr Mukul bad bynrap “Haei kata ka jingïarap? Hato ki la pyllait ïa man ki aplikeshon ha ka por kaba biang? Kat bym pat sdang ka jingtih katkum ka aiñ, kin sdang pynïaid, kin thaw ki lad ki lynti ban pynshlur ïa baroh ki kam tih beaiñ bad ruh ka kam shalan beaiñ jong u dewïong, ïaid lait ïa baroh ki kyndon kynthup ruh ka jingïaid lait ïa ka rai jong ka ïingbishar Supreme Court.”
Haba kdew ïa ka kaiphod kaba la aiti da u Justice Katakey halor ka kam tih dewïong beaiñ hapoh ka jylla, une u Myntri Rangbah barim u la ong, “Hato phi la ïohi ïa ka kaiphod jong u Justice Katakey ha kaba ka kaiphod ka la kdew ba ka long mar khongpong bad kaei kaba la kam da ka sorkar ba u don haduh 32 lak metric ton jong u dewïong ba la buh ha ki jaka pyllang bapher bapher jong ka district, naba katkum ka jingkheiñ jingdiah bad ka jingbishar, u dewïong uba don un nym don palat ïa ka 19 lak metric ton.”
Shuh shuh u la ong, “Ka mut kaei kaba nga la dep ban kren mynshwa ka long ba ka sorkar jylla hapoh ki nongïada jong ka, ka la ailad ym tang ïa ka jingtih dewïong beaiñ hynrei kumjuh ruh ïa ka jingshalan beaiñ bad ka jingdie ïa u dewïong uba la lum thup ha ki jaka pyllang dewïong ha kylleng ki district ha ka jingduhnong jong ka jylla.”
U la ong ruh ba u dewïong uba la buh ha kine ki jaka u la shu jah la ka jah kumto khlem kano kano ka jingïoh khajna jong ka sorkar bad ong ruh ba ka sorkar ka la ailad ïa kane ka kam ban jia hapoh ka jingïada ka jong ka.
