Shillong, Jymmang 11:
U Symbud Myntri Rangbah ka jylla, Bah Sniawbhalang Dhar u la ong ba ka sorkar kan sa khot biang ïa ka jingïalang bad ka Harijan Panchayat Committee (HPC) na ka bynta ban ïakren halor ka jingpynkynriah ïa ki briew kiba shong ba sah ha Them Ïew Mawlong. Ïa kane ka sorkar kan sa pyntip ïa ka por bad ka sngi ban pynlong ïa ka jingïalang.
Haba kren sha ki lad pathai khubor ha ka Sngi Palei, u Bah Sniawbhalang u la ong ba ka sorkar ka la dep ban phah ïa ka ‘Affidavit’ sha ka ïingkashari bad ha kajuh ka por ka sorkar ka dang ap ïa ka hukum jong ka ïingbishar na ka bynta ban leh ïa kaba donkam.
U Bah Sniawbhalang u la ong ruh ba na ka liang ka sorkar ka la pyntip sha ka ïingbishar ba ka HPC ka khlem mynjur ïa ka saiñdur lane ka ‘Blueprint’ ba la pynkhreh da ka sorkar ha kaba ïadei bad ka jingpynkynriah ïa ki briew na Them Ïew Mawlong.
Shuh shuh u Bah Sniawbhalang u la ong ba ka jingdawa jong ki Harijan da ka jaka kaba haduh 200 sq meter bad ka pisa kaba 20 lak tyngka ha man la kawei-pa-kawei ka unit ka long ka bym lah ban long namar ka dei ka jingdawa kaba heh.
“Kata ka dei ka jingdawa ka bym lah ban long namar ka dei ka jingdawa kaba heh,” la ong u Bah Sniawbhalang.
Kum ban shu pynkynmaw ki longïing jong ki Harijan kiba shong ba sah ha Them Ïew Mawlong ki don haduh 342 tylli bad na ka liang ka sorkar ka thmu ban pynkynriah ïa baroh kitei longïing napoh katei ka jaka.
