New Delhi, Jymmang:
Hadien ka sngi ba lah pynlong ia ka jingpyniakab kynhun ialehkai phutbol ha Qatar Opera House kaba ha nongbah Doha, ka khubor ba lah ioh lum ka iathuh ba ka kynhun ialehkai phutbol jong ki shynrang ka ri (Ind) ka lah shah pyniakab mynta ha ka Group B jong ka lympung ialehkai mynta u snem ka ban sa long ha Qatar ka AFC Asian Cup.
Ka khubor ka iathuh ruh ba katei ka kynhun ialehkai ka ri kaba shong ha ka kyrdan ba 101 ha ka thup kyrdan jong ka FIFA bad ka ban ialehkai ruh ha katei ka lympung ialehkai ka ban wan ha ka sien kaba san. Katei ka kynhun ialehkai ka ri kan pynkhreh ruh na ka bynta ba kan iakynduh ia aireng bad ka Australia ( kyrdan 29), Uzbekistan ( kyrdan 74) bad Syria ( kyrdan90) ha ka lympung iakhun baroh kawei.
Ha kata ka sngi jong ka jingpyniakab ia kaba lah sdang na ka Pot 4, ka kynhun ialehkai ka ri ka long kaba nyngkong ban shah pyniakab ha ka Group B da kaba khur ia ka B4 hadien ba ka long ka kynhun kaba seisoh ban shah pyniakab mynta ryngkatlang badka Syria (B3), Uzbekistan (B2) bad Australia (B1). Kumta ki jingia aireng jong ka kynhun kin long kiba kham eh bad ba jwat ha kaba katei ka kynhun ialehkai kan hap ban iakhun pyrshah ia kitei ki kynhun ialehkai ha ka lympung bad ka long ka jingiakhun kaba kham eh shuh shuh mynta ban ha ki saw snem ba lah leit noh, hynrei kum ka kynhun kan iengskhem na ka bynta ban iakhun bha ha man la ki sienjam ba ka ieid lynti.
Ka sien kaba khatduh ha kaba lah dep ban pynlong ia katei ka lympung ialehkai ha Qatar ka long 12 snem mynshuwa bad naduh kata ka por katei ka ri ka lah long kaba seisoh ha ka ban pyntyllun ia ki lympung ialehkai phutbol bapher bapher ba ka ioh ban pynlong bad kumjuh ruh ka jingiaid lynti ba seisoh jong katei ka kynhun ialehkai ka ri. Kumba ka long mynta na ka bynta katei ka lympung ialehkai mynta u snem, yn don 24 tylli ki kynhun ialehkai ha ryngkat bad ka trophy ba thymmai bad ka song pisa kaba 15 million dollar.
Ha kiwei pat ki group jong ka lympung, ka kynhun ialehkai na Qatar ka shong ha ka kyrdan ba hakhlieh ha ryngkat ba ka jingsdang jong ka ban iada ia ka khusnam da ka jingsdang ka jingiaid lynti ha ka lympung pyrshah ia ka China PR, Tajikistan bad Lebanon. Kumjuh ruh ka Islamic Republic of Iran, United Arab Emirates, Hong Kong, China bad Palestine kin long ki kynhun ialehkai ki ban phaikhmat na bynta ka rynsan iakhun knockout; katba ka Japan, Indonesia, Iraq bad Vietnam ki shah pyniakab mynta ha kawei pat ka group.
Shuh shuh ruh ka Korea Republic kaba shong ha ka kyrdan ba nyngkong, kan don ruh ia ki kynhun ki ban iakhun pyrshah bad ka; kata ka Malaysia, Jordan bad Bahrain, katba ka Saudi Arabia, Thailand, Kyrgyz Republic bad Oman ki ban iakhun ban ioh jaka sha ka rynsan iakhun knockout stage.
Ka khubor ka iathuh ruh ba 2 tylli ki kynhun ialehkai na man la ki group kin ioh ban rung beit sha ka jingiakhun pre-quarterfinal jong katei ka lympung ialehkai, katba ki saw kynhun ialehkai kiba wan ha ka jaka balai, kin pyniasoh ialade bad kitei ki ar kynhun ha ka rynsan iakhun knockouts.
Ka risol kaba lah mih na ka jingpyniakab:
Group A: Qatar, China PR, Tajikistan, Lebanon
Group B: Australia, Uzbekistan, Syria, India
Group C: IR Iran, United Arab Emirates, Hong Kong, Palestine
Group D: Japan, Indonesia, Iraq, Vietnam
Group E: Korea Republic, Malaysia, Jordan, Bahrain
Group F: Saudi Arabia, Thailand, Kyrgyz Republic, Oman.
