Jowai, Jymmang 12:
Tang hapoh 24 kynta ka jingshah thang ki artylli ki ïing trep ha ki lyngkha jong ki nong Khanduli, ki nong Karbi ki la thang biang sa kawei ka ïing trep ha ka nohphai sngi jong ka Sngi Thohdieng katba ki nong Khanduli haduh mynta ki dang plie beit ïa ka jingkhang ban ïakren ïasuk.
Kum ban shu pynkynmaw ha ka Sngi Palei, ki paidbhur jong ka jaitbynriew Karbi ki la pynjulor ïa ka kali jong u SP ka West Jaiñtia Hills District u Bah Chemphang Syrti hadien ba uwei u Karbi u la mynsaw na ka jingshah shoh ha ki nongshong shnong ka Khanduli. Kane ka jingshah shoh ka long ba hadien phra ngut ki Karbi ki la thang ïa artylli ki ïing trep jong ki nong Khanduli ha ka lyngkha kaba dang hap hapoh u pud u sam ka Khanduli bad ki nong Karbi ki la byrngem byrsit ïa uwei u nong Khanduli.
Kumba ha ka por 3 baje nohphai sngi jong ka Sngi Thohdieng katba u Deputy Commissioner jong ka West Jaiñtia Hills u Bah B.S. Sohliya bad u Bah Syrti ki dang shong jingïalang bad ki nongïalam shnong Khanduli, ka la poi syndet ka khubor ba ki nong Karbi ki la thang sa ïa kawei ka ïing trep ha ka lyngkha ba don hajan u lum jingtep bad ka ktem pulit Assam.
Ki nong Khanduli da ki spah ngut ki la thmu ban leit hiar sha katei ka jaka ban tohkit, hynrei u DC bad u SP lem bad ki pulit ki la khanglad khnang ban nym jia kino kino ki jingjia sngewsih.
Ha shwa katei ka jingshah thang katei ka ïing trep, kumba 500 ngut ki nong Khanduli ki dang shu dep ban shong ha ka jingïalang paidbah ba la pynlong da ka Dorbar Shnong Khanduli ha madan phutbol Khanduli.
Ha katei ka jingïalang la ïoh ïa ki jingkren na u Waheh Shnong ka Umshangiar, ka Lapangap, ka Umplu, ka Namdong B, ka Saitsama bad na ka seng KSU kiba la ai ka jingkyrshan ïa ka shnong Khanduli.
Haba ïakren bad u Waheh Shnong ka Khanduli, u Bah Yooshida Nongspung u la ïathuh ba ka jingïalang ka la shim ïa ka rai ba katba ki nong Karbi kim pdiang ïa ka jingtyrwa jingsuk noh kin dang bteng ïa ka jingkhang ïa ka rung ka mih ki nong Karbi sha Khanduli bad ka ïadie ïathied bad ki Karbi.
Shuh shuh la rai ba ki shnong kiba marjan bad ka Khanduli kin sangeh shwa ïa ka ïadie ïathied bad ki nong Karbi.
U Bah Damian War, Organising Secretary ka FKJGP, u la dawa na ka sorkar ban thwet ïa kiba donkti ban thang ïa ki ïing trep bad kyntu ruh ïa ka sorkar ban wad ki lad ki lynti ban wanrah ïa ka shongsuk shongsaiñ khnang ba ki nong Khanduli kin ïoh ban leit rep leit riang.
