New Delhi, Jymmang:
Kum shi bynta ban kyntait halor ka jingtharai jong kiba bun ba lang ba la leit ban pynïasoh bad kawei pat ka seng kumba la pynbna da ki seng riewlum, u Myntri Rangbah jong ka Odisha u Naveen Patnaik u la ong ba ha ka sngi Palei ka seng Biju Janata Dal (BJD) kan sa ïakhun hi marwei ha kaba ïadei bad ka jingdon jong ka ilekshon Lok Sabha ka ban sa long ha u snem ban wan naba ka la ju leh kumne na ka por sha ka por.
Kane ka jingkren jong u ka la long khyndiat sngi hadien ba u nongïalam jong ka seng JD(U) u Nitish Kumar u la ïakynduh ïa u halor ka jingthmu ban trei shitom na ka bynta ban wanrah ka jingïatylli jong ki seng ka liang pyrshah.
Ha ki khyndiat sngi ba la leit, u Kumar u la ïakynduh ïa ki nongïalam jong kiba bun ki seng saiñ pyrthei lait noh ki jong ka seng BJP halor ka jingthmu jong u ban ïasnohktilang bad ban pynïatylli kawei ha ka ban ïakhun pyrshah ïa ka seng kaba bat ïa ka jingsynshar ha ka jingïakhun ïa ka ilekshon Lok Sabha 2024.
U Patnaik, uba la ïakynduh ruh ïa u Myntri Rangbahduh u Narendra Modi ban ïakren halor ki mat ba ïadei bad ki kam pynroi ha ka jylla, u la kyntait ba u la don ka jingthmu ban ïatreilang bad kane ka seng.
U la ïai ban da kaba ong ba ka nongrim jong ka seng BJD ka la don shajngai na baroh ar tylli ki seng, kata na ka seng Congress bad ka seng BJP.
U la batai shai ruh ba u Myntri Rangbah jong ka Bihar u Nitish Kumar u la leit ban ïakynduh ïa u ha Bhubaneswar ha ka sngi Ba-ar.
U Patnaik u la don ha kane ka kynhun ha Odisha naduh u snem 2000 bad ka seng BJD jong u ka la long kawei na ki seng riewlum kaba la ïaleh ban ïeng skhem halor ka mat ba ïadei bad ka jingïakynad hapdeng ka seng BJP kaba bat ïa ka jingsynshar bad ka liang pyrshah.
Ha kine ki por ka la ai jingkyrshan ruh sha ka liang jong ka BJP ha Parliament.
U Patnaik u la ong ba u la ïakynduh ïa u Myntri Rangbahduh bad pynsngew ïa ki mat ba ïadei bad ki kam pynroi ha ka jylla jong u.
