Nongpoh, Jymmang 12:
Hadien ka jingmih khubor jong ka jingdon ki briew na Rilum Garo kiba la kem pang prie pynhiar na ka jingbam ïa ka dohkha kaba la sniew ha kawei ka ïing ïap briew ha ka jylla Assam, ha Ri Bhoi ruh ki don kumba 31 ngut eiei ki briew kiba ngat ha kane kajuh ka apot.
Kine ki briew kiba la ngat ha Ri Bhoi District ki dei kiba na ka shnong Nongladew kaba hap hapoh ka Jirang konstitwensi. Katkum ba la ïohlum jingtip kumba 41 ngut na kane ka shnong ki la mih ban leit sngewlem sha katei ka jaka ïap briew ha ka shnong Mariampur jong ka Goalpara District ha ka jylla Assam ha ka 9 tarik Jymmang.
La ïoh jingtip ba napdeng kitei ki 41 ngut, 31 ngut ki la wanphai noh sha la shnong bad kem pang ha ka miet jong ka sngi kaba bud, kata ha ka 10 tarik Jymmang. Hadien kata la pynkit noh ïa ki sha Patharkhmah CHC na ka bynta ban ïoh ïa ka jingsumar kaba kyrkieh.
Shuh shuh la ïoh jingtip ba napdeng kitei ki 31 ngut, kumba 15 ngut ki dei kiba la kham shitom jur bad la pynthiah noh ïa ki ha katei ka jaka ai jingsumar katba ïa kiwei kiba shitom malu-mala pat la shu ai dawai bad pyllait noh ïa ki. La ïoh jingtip ba 10 ngut kiwei pat napdeng kitei ki paidbah nongshong shnong ki dei kiba don mynta hapdeng ka jingsumar hapoh ka jylla Assam.
Haba pyrshang wad jingtip na u Medical Officer ka Patharkhmah CHC, u Dr L Gashnga, u la ïathuh ba ka dei shisha ba ka la don ka jingkem pang prie bad pynhiar jong ki briew na ka shnong Nongladew. Hadien ka jingtip halor kane ka jingjia, la bthah ïa ki kali kit nongpang bad ruh ki kali shimet ban pynpoi ïa kitei kiba shitom sha Patharkhmah CHC na ka bynta ïoh ai ïa ka jingsumar.
U la ïathuh ba na ka liang ka Patharkhmah CHC ruh ki la ïaleh ban ai ïa ka jingsumar kaba paka sha kitei ki nongpang bad kumba long mynta kiba bun ki la kham koit bad la pyllait noh na katei ka jaka ai jingsumar.
Halor kane ka jingjia, na ka liang ka shlem treikam jong u DMHO ka Ri Bhoi ruh u la phah ïa ka kynhun ban leit shim nongmuna na kitei ki nongpang na ka bynta ban pynlong ïa ka jingïit bniah ban lap ïa ka daw jong katei ka jingkem pang kitei ki briew shnong.
