Shillong, Jymmang 12:
Ka Voice of the People Party (VPP) ha ka Sngi Thohdieng ka la pynlong da ka jingïakynduh lang ha shwa ba kin leit ban aiti da ka dorkhas sha ka sorkar ban dawa ba ka dei ban pynsangeh noh mardor ïa ka jingpynrung kam ha ki tnat sorkar bapher bapher katba kam pat wanrah ïa ka jingpeit bniah halor ka bhah thung kam thung jam lane ka Reservation Policy bad ka jingkheiñ ïa ka bhah (Roster System).
Ïa katei ka jingïalang la pynlong ha ka Parking Lot kaba don hajan Additional Secretariat ha kaba la ïohi ba ha katei ka sngi ki paidbah ki la wan ban ïalum lang ha katei ka jaka ban ai jingkyrshan ïa ka seng ha kaba ïadei bad kane ka jingdawa jong ka seng.
Haba ai jingkren ha katei ka sngi, u President ka VPP, u Bah Ardent Miller Basaïawmoit, u la ong ba hadien ba la ïakren ban pynsangeh shwa ïa ka Roster System hapoh ka jylla, hynrei ka sorkar ka la pynsted ban khot thep kam man la ka taïew bad lada shah ba ka sorkar kan dang khot ban pyndap ïa ki kam kiba thylli ha kane ka dur, kan long ka jingduhnong kaba khraw ïa ka jaitbynriew.
U Bah Ardent u la ong ba hadien ba u Myntri Rangbah ka jylla u la ong hapoh ïingdorbar thawaiñ ka jylla ba ki bym sngewïahap halor ka bhah thung kam thung jam, ki lah ban leit sha ïingkashari. Hynrei, na ka liang ka ïingkashari ka la jubab ba kane ka dei ka kamram jong ka sorkar ban rai naduh lano yn hap ban pyntreikam ïa ka ‘Roster System’.
“Ngi sngewthuh ba ki nongïalam jong ngi kiba don ha Secretariat na ka por sha ka por kim ju kwah ban ïakren ïa ki jingeh kaba ka jaitbynriew ka ïakynduh, hynrei da ki ïohlad ki ñiat sha kadiang bad sha kamon, ki ñiat kylleng kylleng haduh ba kim kwah ban shim ïa ka jingkitkhlieh,” la ong u Bah Ardent.
Nangta utei u nongïalam ka VPP u la kren bynñiaw ruh halor ka jingduna jong ka jingwan ïashimbynta ki paidbah ha katei ka jingïalang khamtam na ka liang ki samla kiba dei ka lawei jong ka jaitbynriew.
“Ka sorkar kumba ka long mynta, nga tharai ki la phuh samrkhie namar ki ïohi ba tang kito kiba kwah ban pynkylla ïa ka bhah thung kam thung jam bad tang kito kiba kwah pynbeit,” la ong u Bah Ardent.
Shuh shuh u Bah Ardent u la ong ba lada ki paidbah khamtam ki samla ka jaitbynriew kim ïa mih shakhmat ban ai jingkyrshan kan buh jingeh ïa ki kum ki nongïalam. Nalor kata, u la ong ba lada u paidbah u mih ryntih, tang katto katne por ïa kane ka mat yn lah ban pynbeit, hynrei lada ka jingwan jong ki paidbah sha ka jingïakhih ka long kaba duna, na ka liang ka sorkar kan dang ïai pynslem na ka por sha ka por.
Kumta na ka liang u Bah Ardent u la buh ruh da ka por kaba long 48 kynta ba lada ka sorkar kam pynsangeh mardor ïa ka jingthung kam jingthung jam, na ka liang ka seng kan sa khot da ki jingïakhih bapher bapher ha ki sngi ki ban sa wan.
