Shillong, Jymmang 12:
U President ba rangbah ka Voice of the People Party (VPP), Bah Ardent Miller Basaïawmoit ha ka Sngi Thohdieng u la pynsngew ba ka long kaba bakla jur ban ong ba ki don 3 tylli ki jaitbynriew trai-ri hapoh ka Jylla.
“Kane ka dei ka jingbakla, ki don tang 2 tylli ki jaitbynriew hapoh ka Jylla, ki Khasi bad ki Garo. Hynrei ka jingpyrshang ban phiah ïa ki Khasi hapdeng ki Jaiñtia, Bhoi, War…kane kan shu wanrah tang ka jingeh ïa ngi,” la ong u Bah Basaïawmoit haba jubab halor ka jingkylli ba ki don 3 tylli ki jaitbynriew hapoh ka Jylla.
U la ong ruh ba ka long kaba sngewsih ba ki ’riew saiñ pyrthei ki pyrshang ban phiah pynban ïa ka jaitbynriew khnang ba ki lah ban synshar da kaba suk.
“Ngim pdiang ïa kata ka jingong ba ki don 3 tylli ki jaitbynriew ha ka Jylla…ka dei ka jingshisha ba ngi don tang 2 tylli ki jaitbynriew ha ka Jylla…ha kaba la tip ïa ki Khynriam, Pnar, Bhoi, War, Maram, Lyngngam…ngi long kawei kum ka jaitbynriew,” la ong utei u nongïalam.
Haba kylli ba ka Sorkar ka pynleit jingmut beit thik na bynta ka jingpyntreikam ïa ka ‘Roster System’, u President u la ong ba kata ka lah ban long tang ka jingong jong ka Sorkar hynrei ka nongrim jong ka seng ka long kaba shai; ka jingeh kam dei bad ka ‘Roster System’, hynrei ka bhah thung kam baroh kawei.
“Kam ïa biang tara, te kumno phi lah ban phiah ïa ka mat treikam tang da 2, phi donkam ban sngewthuh ïa ka jingbun briew hapoh ka Jylla. Phi donkam ban peit ba ka jingbun paid jong ki Khasi-Jaiñtia ka kham bun ban ïa ka jingbun paid ha Ri-lum Garo,” u la ong.
Ha kajuh ka por, u la buh jingkylli ba kumno yn khmih lynti ba katei ka mat treikam kan mang mar katjuh hapdeng ki 2 jaitbynriew.
