Shillong, Jymmang 12:
Ka Myntri ka tnat ka rep ka riang, ka Kong Ampareen Lyngdoh ka ai jingmut ïa ki nongrep ban wan sha Secretariat haba ki mad jingeh.
Ka Kong Ampareen ka la kren ïa kane haba ka leit sha Ïewduh ban ïashem markhmat bad ki nongrep kiba wan die ïa ki mar rep ha kaba la ïakren ruh shaphang ka jingot kilo ïa ki mar rep da ki mahajon ne nongkhaïi kiba thied ïa ki mar rep.
Ha kane ka jingleit sha Ïewduh, la don lang ki MLA prah ba kynthup ïa u Bah Ardent Basawmoit bad u Bah Adelbert Nongrum.
U Syiem ka Hima Mylliem lem bad ki Myntri ka Hima ruh ki la leit lang ha kane ka jingleit ka Myntri sha Ïewduh.
Ka Kong Ampareen ka la ïoh ki jingujor na ki nongrep bad nongdie ba ki don ki blang baïong (’langïong) ha Ïewduh.
Kane ka Myntri ka rep ka riang ka la ong ba yn thaw ruh ïa ka Committee ban peit bniah ïa ka aiñ kaba ka Khasi Hills Autonomous District Council (KHADC) ka thmu ban wanrah haba ïadei bad ka ïew.
Kane ka jingleit ka Myntri sha Ïewduh ka dei ba ki Executive Member ka KHADC ki la leit sha Ïewduh hadien ba la mih ka jingud jingnam na ki nongrep ba shah ot kilo bad jingbun kiba die madan kiba dei ki bar Jylla bad ki bym don laisen khaïi.
