Shillong, Jymmang 12:
Hadien ba la kut ka jingïakynduh lang jong ka seng Voice of the People Party (VPP) kaba la long ha ka Sngi Thohdieng ha ka Parking Lot kaba don hajan ka Additional Secretariat, ki nongïalam jong ka seng kiba kynthup ïa u Dr Ricky A Syngkon uba dei u General Secretary bad u Dr Kara H Chen uba dei u Vice President ki la leit ban aiti da ka dorkhas sha ka sorkar halor ka jingdawa ban pynsangeh noh ïa ka jingpynrung kam katba ym pat pynbeit ïa ka ‘Roster System’ bad ïa ka ‘Reservation Policy’.
Katei ka jingleit ai dorkhas jong ka seng ka long ban dawa na ka sorkar ba ka dei ban pynsangeh shwa ïa ka jingthung kam thung jam ha ki tnat sorkar bapher bapher bad ka seng ka la buh por 48 kynta ba ka sorkar ka dei ban pynsangeh ïa kane da kaba pynmih ïa ka jingpynbna lym kumta, ka seng kan sa pynbna da ki jingïakhih bapher bapher.
Hashwa, ba ka seng kan leit ai ïa katei ka shithi, na ka liang u President rangbah ka seng, u Bah Ardent Miller Basaïawmoit u la ong ba ki MLA ka VPP kin ym leit ban ai hi ïa katei ka shith,i hynrei kin leit da ki nongkitkam ka seng.
Ïa katei ka shithi la aiti ha u Bah Sniawbhalang Dhar uba dei u Symbud Myntri Rangbah ka jylla ban pynpoi sha u Myntri Rangbah ka jylla, u Conrad K Sangma namar ba u Myntri Rangbah um don ha nongbah Shillong.
Hadien ba ki nongkitkam ka seng ki la wan ban aiti ïa katei ka dorkhas ha u Symbud Myntri Rangbah ka jylla, na ka liang u Bah Ardent haba ai jingkren ha ka jingïalang, u la ong ba ka seng kan sa shu pynkhreh beit ïa ka jingkut jong kata ka 48 kynta bad lada ka sorkar kam kwah ban pyllait ïa ka jingthoh ban pynsangeh ïa ka jingthung kam thung jam, ka seng kan hap ban pynkhreh da ki jingïakhih.
“Ngin sa pynbna bad ngin sa ïakynduh shen noh ma ngi ki nongïalam jong ka seng ba ngin ïa pyrkhat kaei ka jingïakhih kaba nyngkong kaba ngin sdang bad ka ban pynbud ter-ter na kawei ka por sha kawei ka por,” la ong u Bah Ardent.
U Bah Ardent u la ong ba ka jingïakhih kan nym long kaba tang shiteng lynti, hynrei ka jingïakhih kan long ka jingïakhih ka ban long haduh ban da jop.
“Ngin hap ban kyntu ïa ki samla jong ngi ba kumno kin ïashimbynta bad ha kano ka rukom kin ïashimbynta ïa kita ki jingïakhih ki jong ngi. Ngin sdang da ki jingïakhih kiba jai jai nyngkong bad lada ka sorkar ka dang pyneh, ngin dang hap ban pynkhlaiñ bad ban ai ki jingïakhih kiba tyngeh,” la ong u Bah Ardent.
