Delhi, Jymmang:
Na ka liang jong ka All India Football Federation (AIFF) ka pynbna paidbah mynta ba ka lah shim ia ka rai ba ka 23 tarik u Jylliew kaba dei ka sngi-kha jong u khlur ialehkai phutbol ba pawnam bha jong ka ri u Pradip Kumar Banerjee, kum kata ka sngi rakhe ia ka ‘AIFF Grassroots Day’.
Kum u nongialehkai ba pawbha jong ka ri ia kaba lah tip ruh kum u PK, utei u rangialehkai u lah ialam ia ka kynhu baroh kawei ha ka lympung ialehkai Olympic ha Rome ha usnem 1960 bad uba lah shadkmen ruh ha ka jingpyntyllun ia ka kam jong u kum u nongialehkai ha shuwa ba un shimti ia ka kam kum u nongpyniaid ka kynhun ha kaba ka kynhun ka lah ioh ban mad ia shibun ki jingseisoh.
Ka jingjied ia katei ka sngikha ka jong u ha ka ban rakhe ia kata ka AIFF Grassroots Day, na ka liang jkong u Secy. Genl ka AIFF u Shaji Prabhakaran u iathuh ba ka ri ka ju iai dem-klet ruh ba u PK u long ruh u nonghikai uba ju iai seisoh ha ka kam shakri ka jong u ruh kumjuh.
Kumta shisien ba u lah iehnoh ia ka kam ialehkai, u lah shimti pat ia ka kam nongpyniaid bad ha ki 30 snem ba hadien u la lah ban sei ia ki nongialehkai kiba tbit kiba lah seisoh ha ka kam ialehkai jong ki ha ki lympung ialehkai kiba ju long ha ka ri bad Shabar ruh kumjuh.
Ka kam ba maian jong utei u nong-ialehkai ka long ba u dei u nongialehkai ba hakhmat jong ka kynhun ialehkai baroh kawei ha kaba u lah thaw ruh ia ka khana-pateng ha ka ri da kaba khur ia ka takma Ksiar ha ka lympung ialehkai Asian Games 1962.
Ha u snem 1969, ha ka por ba ka FIFA ka lah pynlong ia ka jingai jinghikai kaba nyngkong sha ki nongpyniaid ha ri Japan hapoh ka jingialam jong u nongpyniaid na Germany u Dettmar Cramer, u Banerjee u lah ioh ha ka ban pynrung kyrteng ialade na ka bynta ka jingshimbynta ha katei ka prokram ai jinghikai bad uba lah wanphai iing ha ryngkat bad u ia ka kyrdan 1st Class Degree.
Dei ha u bnai Lber jong u snem 2020 ba u PK Banerjee u lah khlad noh bad ka synjuk baroh kawei ka iathuh ba kan iai burom ia utei u nongialehkai ba pawkhmat ka ri na ka por sha ka por kum ka jingkynmaw ieid ia u da kaba pynthikna ruh ia ka jingkiew sted jong ka kam ialehkai phutbol ha ka ri naduh tyllong.
Ia u Banerjee lah niew kum uwei na ki khlur ialehkai phutbol ka ri bad u long ruh uba pawkhmat ha ka jinglah ban pynioh bun kol tam na ka bynta ka kynhun ialehkai kari kata da haduh 4 kol kaba ka kynhun ka lah sar shaduh ka lynti jingjop ha ka Asian Games 1962.
