Paris, Jymmang:
Katkum ka khubor ba lah pyllait da kawei na ki lympung iakhun Grand Slam jong ka jingialehkai Tennis ka French Open, ka long ba katei ka lympung ialehkai mynta u snem ka pynkhreh na ka bynta ka jingpynkiew song pisa da 49.6 million euros ($54.6 million); kata da haduh 12.3% jong u snem 2022.
Kumta ha kaba iadei bad katei ka bynta, katei ka song pisa ba thymmai ia kaba lah tyrwa mynta na ka bynta katei ka lympung iakhun ka ban sa long na ka bynta ka kyrdan iakhun paramarwei ha ka jingpyniakab ka jong ka, kan kiew mynta da 9.1% na ka song pisa jong u snem 2022, ha kaba kata ka jingkiew kan long kaba sted tam na ka bynta ban pynthikna shuh shuh ia ka jingiasam doh-kyndang kaba bun hapdeng ki nongialehkai. Ka khubor ka iathuh ruh ba ki nongialehkai kiba mad noh ia ka jingshah pynrem ha kaba sdang jong ki lai kylla iakhun ha ka jingiakhun paramarwei kin ioh ban kamai ia ka song pisa kaba long hapdeng ka 11% bad 13 % kaba long khambun ha une u snem ba mynta, ha ryngkat bad ki nongpyniaid ruh ki lah iai pynkiew ia ka song pisa jong ki lai kylla iakhun jong ka rynsan jied nongialehkai da 11.8%.
Ka khubor ka iathuh ruh ba ki lahduh na ka kyrdan iakhun paramarwei jong ki shynrang bad kynthei, kin ioh khung shalade mar 2.3 million euros. Kumta ka song pisa na ka bynta ki shynrang bad kynthei ha ka jingiakhun ba mar arngut, ka lah kiew mynta da 4 %. Ka jingmang pisa na ka bynta ki nongialehkai kiba duna dkhot-met na ka bynta ka lympung iakhun ka jong ki ha ka lympung ka long 810,000 euros, ka jingiaryngkat sha ka 40% ka jingpynkiew mynta na ka song pisa jong u snem 2022.
Na ka liang jong ki nongpyniaid katei ka lympung ki pynbna ruh ba ia katei ka lympung iakhun Grand Slam mynta u snem kan long naduh ka 28 tarik mynta u bnai haduh ka 11 tarik u Jylliew 2023.
