Nongpoh, Jymmang 12:
Ka jingber bih ïa ki um ki wah ban pynïap dusmon ïa ki dohkha dohpnat tang na ka bynta ka lalot, ka jingrhah bad jingmyntoi shimet jong ki katto katne ki ‘riew shim kabu, kam dei shuh kaba dang thymmai, hynrei kaba la ju jia na ka por sha ka por.
Katkum ka khubor kaba la ïohlum mynta ka sngi, la ïoh jingtip ba ha ka Sngi Palei, ka la don ka jingïap satah jong ki dohkha dohpnat ha ka Wah Khri kaba don ha ki thaiñ Patharkhmah jong ka Jirang konstitwensi.
La kynnoh ba ka daw jong kane ka jingïap jong ki dohkha dohpnat ha katei ka wah ka dei na ka jingpyndonkam ïa ka kynja dawai kaba la pynmih na u thied dieng ba la ju tip paidbah kum u ‘Kharu’ bad katkum kawei ka ‘video’ kaba la saphriang ha ki rynsan ‘social media,’ la ïohi ruh ïa uwei u rangbah uba la ïoh ïa u ‘Kha Khla uba khia kumba 80 kilo eiei.
Kum ban shu pyntip, ha ka 10 tarik Jymmang, ki pulit na ka thanat Patharkhmah ki la ïoh ban kurup ïa ar song u ‘Kharu’ bad khang lad ruh ïa ki kynhun kiba thmu ban shoh dohkha ha katei ka wah.
Halor kane ka jingjia, na ka liang u Deputy Commissioner ka Ri Bhoi, u Arpit Upadhyaya, u la pynpaw ïa ka jingsngewkhia jur halor kane ka jingpynïap dusmon ïa ki dohkha dohpnat bad u la ïathuh ruh ba na ka liang jong ka District na ka por sha ka por ka ju pynjari ïa ka kyndon 144 CrPC ban hukum bad mana ban leh ïa kum kine ki jingpynïap dusmon ïa ki jingthaw ba im ha ki wah la ka dei da ka jingber bih, ka jingpynbthei bom ne kiwei kiwei ki rukom ruh, hynrei, la ïohi ba ki don ki briew kiba shim kabu bad ki bym burom satia ïa kane ka hukum.
Halor kane ka bynta, na ka liang u DC u la ïathuh ruh ba la bthah ia ka tnad Fishery bad ki bor pulit ba kin pynlong ïa ka jingtohkit ban lap ïa kiba donkti bad ban pynngat ïa ki ha ki kyndon aiñ kiba tyngeh.
