Yangon, Jymmang:
Katkum ki khubor la ong ba ka Myanmar bad ka Bangladesh ka la phah ia ki hajar ngut ki briew na ka tnat iarap ban leit pynkynriah noh ia ki paidbah nongshong shnong na ki thaiñ them jong kitei ki ri ha ka sngi palei namar ka jingdon jong ka ‘erlangthari ha ka duriaw Bay of Bengal, kaba ap ban leit iaid lynti sha kitei ki thaiñ rud duriaw jong kitei ki ar tylli ki ri.
Namar katkum ka jingpeit thuh jong ka tnat Meteorological, katei ka ‘erlangthari ‘Mocha’ ka lah ban leit hap bad lynshop ha ki bynta khappud jong ka Bangladesh bad ka Myanmar ha kane ka Sngi U Blei.
La ong ba katei ka ‘erlangthari ka lah ban poi kumba 1.5 bad kumba 2 metre lane 6 phut na kitei ki thaiñ ba long them ha kaba da ki hajar ngut ki phetwir Rohingya ki ju shong ha kitei ki bynta khappud jong ka Bangladesh.
Hynrei la ong ba ki don ki paidbah ki bym treh ban mih na katei ka jaka wat la katei ka jingma ka ap ia ka jingim jong ki.
