Shillong, Jymmang 12:
Uwei u samla uba shong ba sah ha Bishop Falls, Lower Mawprem, u la shah kem ha ki pulit ka East Jaiñtia Hills ha ka Sngi Thohdieng bad la ïoh kurup ïa u drok Heroin na u. Ha kajuh ka por, ha kane ka sngi, ki pulit ki la kurup ruh haduh 111.18 kilo u Kynja na kawei ka kali, hynrei ym shym la ïoh kem ïano-ïano na ka daw ba u nongñiah u la phet krad.
Ha u kyrwoh khubor, u Additional SP ka East Jaiñtia Hills, u Bah Banraplang Jyrwa, u la pyntip ba mynta ka sngi ha ka por kumba 11 baje mynstep, ki pulit ki la ïoh khubor ba uwei u nongdie drok u la don ha lynti ban wan sha Shillong na Silchar, Assam.
Hadien ba la ïoh ïa kane ka jingtip, ki pulit ki la pynlong ïa ka jingkhynra ha ka jaka ba hap ha thanat Lumshnong bad ha ka por kumba 1:20 noh phai sngi, la ïoh bat ïa uwei u samla uba la shong da ka kali kamai.
Hadien ka jingpyndep ïa ki jingdonkam katkum ki kyndon ka NDPS Act ha ka jingdon lang ki sakhi, ki pulit ki la khynra ïa ka pla kieng jong utei u samla bad la lap hynriew tylli ki synduk sabon ba la thep da u ‘powder’ rong soh. Hadien ba la peit bniah ïa uta u powder ki pulit shem ba u dei u drok Heroin uba khia 67.36 gram.
Utei u samla uba la shah kem u dei ba la tip kyrteng kum u Gabriel Elvin Thabah, 33 snem ka rta, uba shong ba sah ha Bishop Falls ha Lower Mawprem.
Ki pulit ki la pynrung da ka jingujor ha thanat Lumshnong bad ka jingtohkit ka dang ïaid ban lap sa ïa kiwei pat kiba donkti.
Sa ha kawei pat ka jingjia, u Bah Banraplang u la ïathuh ba ha ka por kumba 1 baje noh phai sngi, u nongñiah jong ka kawei ka kali kaba don ïa u nombor AS-01-AY-6969 kaba la wan na ka thaiñ Silchar, Assam, bad kaba la thmu ban leit sha Khliehriat, u la phet krad bad iehnoh ïa ka kali hadien ba u la ïohi ïa ki pulit kiba la pynlong ïa ka jingkhynra ha Damcherra, Umkiang. Nalor jong u nongñiah, u la don lang sa uwei pat uba la phet krad na kane ka kali.
Ki pulit ki la pynlong ïa ka jingkhynra ïa katei ka kali bad ki la lap ba la don da ki song kynja uba khia 111.18 kilo. Ïa kane ruh, ki pulit ki la pynrung da ka jingujor ha thanat Lumshnong hapoh ki kyndon ka NDPS Act bad ka jingtohkit ka dang ïaid ban lap ïa kiba donkti.
