Jowai, Jymmang 12:
Ka Rangdajied United FC ka la sdang ïa ka jingïaid lynti ha ka lympung Meghalaya State League 2023 da ka jingjop ïa ka Niaw Wasa kaba dei ka lahduh jong u 2017 da 2-0 kol ha ka sngi Thohdieng ha Kiang Nangbah Stadium kaba ha Jowai.
Kane ka nam jop ka la wan urlong lyngba ki kol u Wanlamsuk Nongkhlaw (34’) bad u Damehun Syih (60’) na ka bynta ban pynlong ïa ka Rangdajied United ban khur ïa ki lai dor-thong (point) ba nyngkong eh jong ka Jowai Zone.
Ïa kane ka lympung la plie da u Myntri ka tnat ïalehkai u Bah Shakliar Warjri kum u kongsan ha ka jingïadon lang u MLA ka thaiñ u Bah Wailadmiki Shylla kum u symbud kongsan, u MDC ka Mawsynram Bah Alvin Khyriem Sawkmie, u President ka Meghalaya Football Association (MFA), Bah Larsing Ming Sawyan, u President ka WJDSA, Bah EMH Passah, u District Sports Officer, Bah Khroo Passah bad kiwei.
Haba phai sha ka jingïalehkai dei ki rangïalehkai ka Rangdajied kiba la lah ban ïalehkai bha, wat la ka Niaw Wasa kaba don ïa ki paidbah nongkyrshan, hynrei kam shym la lah ban thep kol.
Ka RUFC ka la ïoh ïa ka kabu kaba biang bha lyngba u Tremiki Lamurong, hynrei ka la shah khanglad ha u rangïalehkai ‘dien ka liang pyrshah. U Mediphrangki Pohleng uba la ïoh ïa ka kabu kaba biang, hynrei um shym la lah ban pynurlong. Hadien kata u kapten ka kynhun u Pynishai Lathong u la pynlehnohei ïa kabu kaba biang.
Ha ka jingshisha ka Niaw Wasa ka la dei ban shah thep kol lyngba ka penalty ba la shut da u Lamurong ha ka minit kaba 18, hynrei u la pynlehnoh ïa kane ka kabu ksiar.
Hadien shiteng kynta ka Rangdajied ka la lah ban pynurlong na ka bynta ban pynkhih jar lyngba ka penalty ba la shut da u Wallamsuk ha ka minit kaba 34 hadien ba uwei na ki rangïalehkai ‘dien ka Niaw Wasa u la kum pyndei da ka kti ïa ka bol.
Hadien katto katne por ba la bteng ïa ka kylla miet, ka Rangdajied ka la ïoh ban pynbud biang ïa ka kol ba ar lyngba u Damehun ha ka minit kaba 60 ha kaba u rangapkol ka Niaw Wasa um shym la lah ban kyrda na ka jingshah thep kol.
Lyngba kine ki ar kol ka la pynlong ïa ki rangïalehkai ka Niaw Wasa ban nang hiar ha ka rukom ïalehkai ha kaba kam shym lah shuh ban pynphai haduh kaba kut jong ka jingïalehkai.
Ïa kane ka lympung yn sdang sa ha ki lai tylli ki zone; kata ha Shillong (Third Ground, Polo) ha kaba ka Mawlai SC kan ïakhun pyrshah ïa ka Jyntru. Ha Mawkyrwat (MDSA Ground) ka Pyndengrei SCSC pyrshah ïa ka Mawten SC. Ha Tura (Chandmari Ground) ka Chipakkore FC pyrshah ïa ka Warima YC. Katba ha Jowai, ka Ladthadlaboh SC kan ïakhun pyrshah ïa ka Sein Pynbhalang SC.
