Jowai, Jymmang 12:
U Myntri ka tnat ïalehkai u Bah Shakliar Warjri u la pynpaw ïa ka jingkhmih lynti ban sdang noh shen ïa ka projek ban pynbha ïa ka Kiang Nangbah Stadium kaba don ha Jowai.
Haba pynpaw ha ka jingïalang plie ïa ka Meghalaya State League 2023 kaba lai ha ka sngi Thohdieng ha Jowai, u Bah Shakliar u la ong, “Nga khmih lynti ba shen yn sa sdang noh ïa ka projek bad ïa ka Detailed Project Report (DPR) la nang ïai pynkhreh da ka Sorkar.”
Shuh shuh u la pynpaw ka jingsngewkmen bad sngewsarong ban ïohi ïa ka jingkiew ka jingïalehkai phutbol hapoh ka Jylla.
Ha kawei pat ka liang u MLA ka Jowai, u Bah Wailadmiki Shylla, u la ong ba ka jingïalehkai phutbol kan yn don lada khlem ki paidbah nongkyrshan bad u la pynshlur ïa ki paidbah ba ki dei ban wan ai jingkyrshan ïa la ki jong ki kynhun. “Kam pher la jop ne rem, hynrei ki paidbah ki dei ban wan ai jingkyrshan khamtam ïa ki klob kiba na Jaiñtia Hills.”
Katei ka jingthmu ban pynbha ïa ka stadium ka la wan hadien ka jingkular da u Symbud Myntri Rangbah ka Jylla u Bah Sniawbhalang Dhar ban mang T. 25 klur ha ka jingïalang pynkut ïa ka jinglehkmen Jubilee ka West Jaiñtia District Sports Association (WJDSA).
Dangshen, u Bah Sniawbhalang u la leit jurip hi da lade ryngkat ki ophisar ka tnat ïalehkai ïa katei ka madan bad la nang pynkhreh ïa ka DPR na ka bynta katei ka projek.
