Shillong, Jymmang 12:
Ka jinglong-jingman jong ka shong suk shong shngaiñ ha Manipur namar ka jingïakynad jaitbynriew kaba jur ha katei ka Jylla kaba la ïalam ruh sha ka jingduh noh jong bun tylli ki mynsiem briew, ka la pynlong ïa ki jaitbynriew (’riewlum) Gangte ban wan phet rieh sha Shillong ha ka janmiet Sngi Thohdieng.
Kitei ki jaitbynriew mynta ki don ha ki jaka sah jong ki bahaïing hasem jong ki ha ka thaiñ Madanrting.
“Ha Meghalaya ka suk ka saiñ, hooid ka la don kawei ka jingjia bad kim dei kiba sah hangne hynrei ki dei ki samla kiba wan pule shane,” la ong u Secretary ka Gangte Relief Community, u S.M. Lalte haba kren sha ki lad pathai khubor.
U la ïathuh ruh ba napdeng kitei kiba la wan sha ka nongbah ha ka janmiet Sngi Thohdieng, don kiba wan da ka liengsuiñ bad don ruh kiba wan da ki kali.
“Ki ïing ki sem jong ki…la shah thang, ki kali, ki tiar…la shah tuh lut, khamtam ka jingthang ïa ki ïingmane kumba la paw ha ki rynsan lad pathai. Ha shnong lajong ngim shngaiñ shuh bad ngi la shu phet lamwir shane-shatai,” u la ong.
Haba pynshai ba ka jaitbynriew Kuki ka dei ka shatri jong kiba bun ki tnat jaitbynriew ba kynthup ïa ki Gangte, Vaiphei, Mar bad kiwei-kiwei, u Lalte u la ong ba ki Gangte kiba la wan poi ha kane ka janmiet ki don kumba 50 ngut eiei.
Haba pynsngew ba bun na ki, ki la mih lut na Imphal bad don ruh kiba dang don ha ki jaka sah ki shipai, u la ong ba ki bor ïada ka Sorkar Pdeng ki ïarap bha ïa ki.
Shuh shuh u la ïathuh ba ki la lum jingïalang ha ka taïew ba la dep bad thoh ruh sha u Myntri Rangbah ka Jylla bad DC ka EKH.
“Hadien 2 sngi, ngi la ïakynduh ïa u Myntri Rangbah bad na ka liang jong u, u la kular ba un ïarap bad pyntip sha ka Dorbar Shnong,” u la ong.
