Shillong, Jymmang 14:
Haba pynpaw ka jingsngewkhia halor ka jingnang rngat ka um bad ka jingpaw dewlynnong ha pung Umïam, ka Khun Hynñiewtrep National Awakening Movement (KHNAM) ka la ong ba ka jingpaw ki dewlynnong ka pynmih ïa ka jingkylli ba balei ka Sorkar ka ailad ïa ki shipai ban tan um na kane ka pung man ka sngi wat haba la tip shai ba lada duna ka um ha kane ka pung kan don ka jingthut ka bording na ka bynta ki paidbah ka Jylla.
Na ka liang ka KHNAM lyngba u Vice President, Bah Thomas Passah, ka la ong ba ka la don ka khubor kaba la batai ba ki paidbah kin lait na ka jingshah pynlip bording tang lada wan u slap, namar kumba ka long mynta, ka pung Umïam ka la paw sa tang ki dew lyngnong, bad kane ka khubor ka pynduh jingkyrmen ïa ki paidbah, bad ka pynpaw bad pynshisha ba ki Sorkar kiba la dep bad kane ka Sorkar kynthup lang ruh ïa ki MLA baroh, ki long ki bym don kata ka jingïohi jngai bad kam don kano kano ka jingpynkhreh haba ïadei bad kane ka mat.
“Halor ka jingpaw jong ki dewlynnong ha pung Umïam, ka jingkylli kaba mih ka long, balei ka Sorkar ka ailad ïa ki shipai ban tan um na kane ka pung man la ka sngi haba ki tip shai ba lada duna ka um kan don ka jingthut ka bording na ka bynta ki paidbah ka jylla,” la buh jingkylli u Bah Thomas.
Nangta u la ong ba ka bording ka dei ka hok (Fundamental Rights) jong u paidbah katkum ka Article 21 jong ka Constitution of India. Ka Delhi High Court ruh ka la batai ba ka bording ka dei ka hok jong u paidbah katkum ka Riti Synshar ka Ri India, bad namarkata, ka jingpynlip bording (load shedding) ka dei ka jingpynkheiñ ïa ka Riti Synshar ka ri.
Nalor kata, ka KHNAM ka la pynkynmaw biang ba ka MeECL ba kum ka tnat ba dei ban peit ïa kane ka bynta, ka hap hapoh ka jingpyrkhing jong ka “Electricity (Rights of Consumers) Rules, 2020” ïa kaba kan hap ban bud ryntih. “Ngi pynpaw ruh ba kam don kata ka jingshai halor ka por pynlip bording ilektrik kaba la pynkulmar ïa ki babun balang.
