Nongstoiñ, Jymmang 14:
Ban nang pynbha ïa ka jingtrei kam jong ka kur, ka kur Mawsor ha ka Sngi Saitjaiñ ka la ïoh ban pyllait paidbah ïa ka riti treikam ha kaba u Bah Jambor War uba long u Executive Member ka KHADC ba dei peit ïa ka tnat Elaka u la long kum u kongsan bad u la pyllait paidbah ïa katei ka riti treikam.
Ïa ka jingïalang jong ka Dorbar Kur Mawsor la pynlong ha ka shnong Mawkhlam – Nongpyndeng.
U Bah Witting Mawsor, u nongaibuit ka kur Mawsor, u la ong ba ha ka jingshisha ïa katei ka riti treikam jong ka kur la shna naduh u snem 1966 ïa kaba la thoh da ki longshuwa jong ka kur Mawsor, hynrei mynta la shu pynjanai bad la shu pynwandur biang ïa ki katto katne ki bym ïahap shuh katkum kane ka juk kaba mynta.
U la ïathuh ruh ba ha kane ka riti trei kam jong ka Kur Mawsor ka kdew bad ka kren ruh ka jingñiewkor ïa ka ïoh ka kot, ka jingburom ïa ka jingnang ka jingstad. U la ong ba ka riti bat khyndew bat shyiap jong ka kur Mawsor ka kham khia na ki para Khasi ha ka bri u Hynñiewtrep bad ka long kaba khlaiñ ha kaba kam dei ka ri kynti, hynrei ka dei ka khyndew jong ka kur bad ka khyndew jong u paidbah bad ym lah ban kam kynti mano mano ruh, hynrei ka dei beit jong ka kur paidbah.
U Bah Jambor haba kren ha katei ka sngi u la ai khublei ïa ka kur Mawsor kaba dei ka kur kaba lap ba shem ïa ka thymmei jong ka naduh ka ïawbei ka banyngkong kaba pynlong ïa ka kur ka jait Mawsor.
“Balei nga ong kumta namar bun ki kur ki jong ngi ha ka jaitbynriew, kim ïoh shuh ïa ka thymmei jong ki lane ka ïawbei lane ka jingsdang ka jong ki namar ba ma ngi naduh kaba sdang ngim don ïa ka thoh ka tar kaba lah ban pynsah jingkynmaw ïa ki pateng ki jong ngi. Hynrei ki hap pdiang bad ki hap pynskhem ïa kata ka longkur ka longjait jong ki kumba ka dei ïa ngi kum ka jaitbynriew,” u la ong.
Shuh shuh u la ong ruh ba kum ka kur ka jait Mawsor ka long shisha ka kur ka jait kaba donbok ba ki longshuwa ki jong ki, ki la ïoh ban bat ïa ka thymmei kaba pynsah ïa ka pateng ki longdien.
“Kane ka dei kaba ngan ai ka burom sha phi ka kur, ki rangbah kur mynta kiba nang ïaid ban pynbha ban pynbit pynbiang ïa ka jingïaid ka jingïalong shi kur shi jait ba kan neh kan sah,” la ong u Bah Jambor.
