Shillong, Jymmang 14:
Ka Meghalaya Clean and Green Organisation (MCGO) kan pynlong ïa ka ‘Mini Marathon’ ha ka 5 tarik u Jylliew 2023 ha ka por 6 baje mynstep. Ka phang pdeng jong kane ka marathon ka dei ‘Run Against Climate Change’.
Kane ka jingmareh marathon kan sdang na Liarbang, ter ter ka ïaid lynti na ka shnong Liarkhla, Kdonghulu, Thadnongiaw, Khweng, Mawbri, Nongrim Nongladaw, Mawtneng, Umshaproh, bad pynkut ha madan Kurkalang Bhoirymbong.
Ha kane ka marathon yn phiah haduh saw kyrdan, kata kan don ka Under-16 ki kynthei, Under-16 ki shynrang bad ka Above 16 ki shynrang bad Above 16 ki kynthei.
Kum ka seng ka khot sngewbha ïa baroh ban wan ïashim bynta kiba najan ne jngai ruh. Ka jingpynlong ia kane ka marathon namar kum ka seng ka sngewkhia halor ka jingkylla jong ka mariang bad suiñbneng. Kumta la pynlong khnang ïa kane ka jingmareh marathon ban ai jingtip bad pynsngewthuh sha ki paidbah nongshong shnong ka thaiñ bad ka Jylla hi baroh kawei, ba kum ki nongshong shnong, dei ban sngewthuh ba ka jingkylla ka mariang kan ktah ïa ka jingim longbriew manbriew jong kane ka pateng bad ki pateng ban dang wan hadien.
Ki form bad ki jingtip ba kham bniah lah ban phone ne WhatsApp ha kine ki number 9233447290, 6909539707. Ha kane ka marathon yn wan pynshngaiñ ruh da uwei u khlur nongïamareh ba la paw ka Jylla, uba la long ruh u nonghikai mareh ‘Coach’ u Bah Jommingstar Ramsiej uba la jop ïa ka Kolkata full Marathon, Mumbai full Marathon bad Delhi full Marathon, pynkut ka kyrwoh na u Bah S Nongkhlaw, Publicity Secretary ka MCGO.
