New Delhi, Jymmang:
Ki nongïalam jong ka seng Congress ha ki khyndiat sngi kiba la leit noh ki la kynnoh ba ki jingïakajia bad ki jingïaumsnam kiba la jia ha ka jylla Manipur ki dei ki jingjia kiba ki kynhun runar ki la thmu lypa la slem; bad na ka liang ki nongïalam jong ka seng ki la dawa ruh ba dei ban pynjari da ka President’s Rule ha Manipur na ka bynta ban tehlakam ïa ka shong suk shong saiñ ha ka jylla.
Halor katei, na ka liang u nongaiktien jong ka Congress – Bhakta Charan Das u la dawa ruh ba ka sorkar ka dei ban pynbiang da ka lad jingïarap kaba mar T.20 lak sha ki bahaïing hasem jong kito ki ‘riew paidbah kiba la shah pynïap bad kumjuh ruh mar T.5 lak sha kito ki nongshong shnong kiba la shah pynjulor ki ïing ki sem jong ki.
Na ka liang u nongïalam ka seng u la dawa ruh ba ka sorkar ka dei ban pynbiang da ki lad jingsumar kiba janai na ka bynta kito kiba la ïoh ïa ki jingmynsaw bad kumjuh ruh ban pynbiang ïa ki jaka sah kiba shngaiñ na ka bynta kito ki paidbah kiba la hap ban mih jyndat noh na la ki jong ki ïing ki sem.
U Das u la kynnoh ruh ba ka sorkar jylla hapoh ka jingïalam jong ka seng BJP kam shym la lah satia ban tehlakam ne shim ïa kino kino ki lad ki lynti ban pynsangeh ïa ki jingïakajia kiba la jia ha ki khyndiat sngi kiba la leit noh. U la kynnoh ba ka sorkar jylla kam shym la lah ban pynsangeh ïa ki jingïakajia, kam shym la lah ban leit pyllait im ïa ki ‘riew paidbah bad kumjuh ruh kam shym la lah ban pynbiang ïa ki jingdonkam kiba man la ka sngi na ka bynta kito ki paidbah kiba la hap ban leit sah shipor ha ki ïing dara.
Halor kitei kiei kiei baroh, na ka liang u Das u la pyntip ba ka seng Congress ka dawa na ka Sorkar Pdeng ba ka dei ban pynjari noh da ka President’s Rule ha Manipur khnang ban pynsangeh ïa ki jingïakajia kiba dang jia tad haduh kine ki sngi kiba mynta. U la kynnoh ba ka Sorkar Pdeng lem bad ka Sorkar Jylla hapoh ka jingïalam jong ka seng BJP kim shym la bud satia ïa ki kyndon jong ka Konstitushon haba ki shim ïa kino kino ki rai kiba ïadei bad kitei ki jingïakajia ha ka jylla Manipur.
U la pyntip ruh ba tad haduh kane ka kynti kaba mynta, na ka liang u Myntri ka Tnat Korbar Ri – Amit Shah um pat shym la wan satia ban jngoh ïa ka jylla Manipur bad kumjuh ruh na ka liang u Myntri Rangbahduh jong ka ri – Narendra Modi um pat shym la pyllait satia ïa kano kano ka kyrwoh ban ïawer na ka bynta ka shong suk shong saiñ.
