UK, Jymmang:
Katkum ki khubor la ong ba ha ka sien nyngkong eh, ka United Kingdom ka la lap ia iwei i khyllung ba la kha bad iba don ia ka ‘DNA’ jong 3 ngut ki briew. Haba iadei bad kane, la ong ba 99.8% ka DNA kaba don ha itei i khyllung, ka dei na ki 2 ngut ki kmie-kpa, katba kaba tam pat ka dei na kawei ka nongai symbai. Ka jingthmu jong kane ka kam ka long ban pyllait ia itei i khyllung na shibun jait ki jingshitom.
Ia katei ka jait jingsumar la tip kum ka Mitochondrial Donation Treatment (MDT), ia kane ka jait jingsumar la ju pyndonkam da kaba shim ia khyndiat ki symbai na ki kynthei kiba shait ba khlaiñ ban pynïoh ia ki ‘IVF embryos’ khnang ban pyllait ia i khyllung na kino kino ki jingshitom kiba lah ban pur na ka kmie sha i khun.
Namar la ju tip ba ki jingshitom ‘Mitochondrial’ ki long kiba eh bad ki bym lah ban pynkoit bad kito ki khyllung kiba ioh ia katei ka jingpang, ki lah ban khlad noh tang hadien khyndiat sngi lane tang hadien khyndiat kynta ba la kha sha pyrthei.
Hynrei ki doktor kiba pynkha ia itei i khyllung na Newcastle jong ka thaiñ North-east England, kim shym la pynshai ia ka jinglah jongki ban pynkha ia itei i khyllung lyngba jong katei ka rukom ‘MDT’.
Hynrei la ong ba ka UK kam long ka ri kaba nyngkong ban pynkha ia ki khyllung lyngba jong ka MDT. Kiba nyngkong eh kiba la leh ia kane ka rukom ka long kawei ka longiing Jordan kaba la leh ia kane hapoh United States ha u snem 2016.
