Shillong, Jymmang 14:
Hadien san snem, ki paidbah ka Sohïong konstitwensi ki la shaniah biang ïa ka ïing ka sem jong u Bah HDR Lyngdoh (bam kwai ha dwar u blei) ban long u nongmihkhmat ka konstitwensi namar ha ka 13 tarik mynta u bnai kaba dei ka sngi ñiew vote, ki paidbah ki la jied ïa u Bah Synshar Lyngdoh uba dei u pyrsa trai jong u Bah HDR ban long kum u nongmihkhmat jong katei ka konstitwensi.
Ka jingjied ki paidbah ïa u Bah Synshar Lyngdoh uba dei kyrtong ka UDP ka dei namar kiba bun ki sngewieid ïa u Bah HDR Lyngdoh uba la long la bunsien kum u nongmihkhmat jong ka Sohïong.
Kum ban shu pynkynmaw, ki paidbah ka Sohïong konstitwensi ki la pynliem noh ïa u Bah HDR Lyngdoh ha u snem 2018 mynba u ïakhun na ka Congress bad jied bujli da u Bah Samlin Malngiang uba ïakhun na ka HSPDP.
Ynda u Bah HDR Lyngdoh u la mih noh na ka Congress ha ryngkat bad baroh ki MLA jong katei ka seng, u la pynïasoh noh sha ka UDP ban ïakhun ïa ka ilekshon MLA 2023. Hynrei kyndit-kynsan u la khlad noh ha ka 20 tarik Rymphang, kata shi taïew shwa ban dei ka sngi thep ‘vote’ bad la hap ban pynsangeh noh ïa ka jingthep ‘vote’.
Haba ka Election Commission ka ri India ka la pynbna ban thep vote ha ka 10 tarik Jymmang 2023, na ka liang ka ïing ka sem u Bah HDR Lyngdoh ka la sei da u pyrsa trai jong utei u rangbah u Bah Synshar Lyngdoh ba un long u kyrtong ka UDP. Ha ka 13 tarik mynta u bnai kaba dei ka sngi ñiew ‘vote’, u Bah Synshar Lyngdoh u la pynliem ïa u kyrtong ka NPP, u Bah Samlin Malngiang da 3,422 vote.
U Bah Synshar Lyngdoh uba la rah ïa ka jingjop u la ïoh 16,679 vote, u Bah Samlin Malngiang uba la shah rem u la ïoh 13,257 vote, u Bah S. Osborne Kharjana kyrtong ka Congress u la ïoh 1,756 vote, u None Of The Above (Nota) u ïoh 272 vote, u kyrtong ka TMC, Bah Stoding Thabah u la ïoh 89 vote, u kyrtong HSPDP, Bah Sandondor Ryntathiang u la ïoh 62 vote, u kyrtong ka BJP, Bah Seraph Eric Kharbuki u la ïoh 40 vote.
Kum ban shu kdew ka jingjop u Bah Synshar Lyngdoh katkum ka jingpaw ha ka ‘social media’ ka dei ka jinglah u Bah Amazing Kurbah ban pynphai nia ïa ka jingkynthoh ki nongïalam ka NPP namar ki paidbah ki sngewtynnad ban sngap ïa ki jingkren jong u ha Youtube haduh ban da dei ka sngi ñiew vote.
