Karachi, Jymmang:
Da ka jingiakhun kaba tyngeh bad khlem kynran-dien noh da ka Pakistan Cricket Board(PCB) na ka bynta ka lympung ialehkai Kriket ka Asia Cup ia kaba dei ban pynlong ha ri Pakistan, hynrei lah pynkynriah noh na ka tei ka ri sha kawei pat, kumta na ka liang jong katei ka synjuk ka lah leit ban buh ia ka jingkyrpad ka jong ka sha ka Asian Cricket Council (ACC) na ka bynta ba kan ioh pynlong ia ki katto katne ki jingialehkai katei ka ri lympung ha ka ri; kata ban ailad ia ka ri baroh kawei ba kan pynlong ia ki saw jingialehkai jong ka kylla iakhun kaba nyngkong.
Lada katei ka jingtyrwa ka jong ka ym shym la lah ban pdiang da ka ACC, na ka liang jong ka PCB ka lah byrngem ban weng noh ialade na ka tei ka synjuk pyniaid jingialehkai Kriket jong ka dewbah-Asia.
Kumta ruh ka Hybrid Model jong u Chairman ka PCB u Najam Sethi na ka bynta ka kynhun ialehkai ka ri ba kan ialehkai ia ki jingialehkai ha-ing, nalor ka jingiakhun pyrshah jong ka India bad katei ka kynhun ha la ri lajong, lah shah kyntait noh ha kiwei pat ki dkhot jong kiwei pat ki ri kiba don hapoh katei ka synjuk. Hynrei na ka liang jong ka PCB, kum ka jingpynphai jubab kylla ka jong ka, ka lah kyntait noh ia ka jingai jingmut na ka bynta ban pynlong noh ia ka tei ka lympung ialehkai ha Sri Lanka.
Ki tyllong khubor ki iathuhruh ba u Sethi u lah buh ia ka jingkyrpad ka jong u sha ka ACC ba lada ka jingthmu kaba ar (Plan B) jong ka PCB lah shah kyntait noh da ki dkhot ka ACC, kumta ruh ka ri baroh kawei kan ym phah ia ka kynhun ialehkai ban shimbynta ha katei ka lympung bad ha kajuh ka por ruh ka PCB kan weng noh ia ka jinglong dkhot ka jong ka na ka synjuk. Ka paw ruh ba u Sethi u lah dep ban pyntip sha ki nongpyniaid ka ACC ba ka PCB kan dap da ka jingkmen kaba khraw ba bun na ki jingialehkai jong ka ba ka dei ban ialehkai bad ki jingiakhun ba dangsah yn ialehkai ha UAE.
