Shillong, Jymmang 14:
Ka lympung Meghalaya State League 2023 ka la sdang ha ka rukom kaba paka bha ha ka sngi Saitjaiñ, ha kaba la pynlong haduh 5 tylli ki jingïalehkai ha kylleng ki madan ba la pynkhreh.
Haba phai sha ka Group B ba la long ha Jowai, la sakhi ar tylli ki jingïakhun, katba la ïoh ban pynlong mar kawei ka jingïalehkai na ka Group A ha Shillong, Group C ha Mawkyrwat bad ka Group D ha Tura.
Haba phai sha ki jingïalehkai ha Jowai, kata ha ka jingïalehkai sdang, ka Rymbai Iawpynsing Sports Club ka la lah ban pynliem noh ïa ka Youth Club Pdengkarong da 2-0 ha ka jingïakhun kaba la long ha Kiang Nangbah Stadium. Ïa ki ar tylli ki kol ka Rymbai la ïoh ban khyrwit da u Slander Nongtdu ha ka minit kaba 6 bad u Vicky Dkhar ha ka minit kaba 28.
Ha kawei pat ka jing-ïalehkai, ka Ladthadlaboh Sports Club kaba dei ruh ka kynhun ba wan ba-ar ha ka lympung Super Division ka West Jaiñtia District Sports Associa-tion, ka la jop kput ïa ka Sein Pynbhalang Sports Club kaba dei ka lahduh jong ka First Division jong ka lympung ba la pynlong da ka Laskeiñ Block Sports Association.
Ha kane ka jingïaleh-kai ka Ladthadlaboh ka la lah ban pynliem noh da 5-0 kol bad ban sdang ïa kane ka lympung ha ka rukom kaba paka.
Haba phai pat sha ka jingïakhun ha Shillong, ka Mawlai Sports Club ka la lah ban pynliem noh da kaba suk ïa ka Jyntru da 5-1 kol. Ha kane ka jingïalehkai u Donlad Diengdoh u la ïoh hat-trick da kaba ïoh thep kol ha ka minit kaba 20, 44 bad 72.
Katba u Sanjini Dkhar u la khyrwit kol ha ka minit ba 28 bad u Remark Kharmalki ha ka minit kaba 78 ban pynlong ïa ka Mawlai kaba dang ïaleh-kai ha ka sien kaba nyngkong ha kane ka lympung, ka jingjop kaba biang eh ha ka jingïalehkai kaba la long ha madan MFA Turf ha Polo. Ïa ka shi kol ka Jyntru pat la ïoh ban thep da u Emanbhah Marbaniang lyngba ka jingshut penalty ha ka minit shwa ban wai ka jingïalehkai.
Ha Mawkyrwat, ka Mawten Sports Club ka la pynliem noh ïa ka Pyn-dengrei Sports Club da 2-1 kol. Katba ka jingïakhun ha Tura pat ka la kut noh ha ka jingïakhaid da mar shi kol hapdeng ka Chipakkore Football Club pyrshah ïa ka Warima Youth Club kaba la long ha madan Chandmari.
Ha ka sngi Nyngkong pat ka jingïakhun ha kane ka lympung kata ha Shillong jong ka Group-A kan long hapdeng ka Umrit pyrshah ïa ka Seng Samla Laitryngew ha ka por 3 baje janmiet. Ha Jowai jong ka Group-B kan long hapdeng ka Mulait United pyrshah ïa ka Youth Club Pdengkarong ha ka por 2:30 mynsngi.
Ka jingïalehkai ha ka Group-C ha Mawkyrwat kan long hapdeng ka Seven United pyrshah ïa ka Lumdiengngan ha ka por 3 baje janmiet bad ha ka Group-D ha Tura ka jingïakhun kan long hapdeng ka Selsella Sports Association pyrshah ïa ka Wasa Football Club ha ka por 3 baje janmiet.
