Shillong, Jymmang 14:
U President ka United Democratic Party (UDP), Bah Metbah Lyngdoh u la ong ba ka seng kan ym long ka daw ban pynkhyllem ïa kano-kano ka Sorkar.
“Nga kwah ban ong ba kum ka seng, kumba ngi la ai ka kular jong ngi ha ki 5 snem kiba la dep, ngi la ong ba ka UDP kan ym dei ka daw jong ka jingpynkhyllem ïa kano-kano ka Sorkar,” la ong u Bah Lyngdoh haba kren sha ki lad pathai khubor.
Haba pynkynmaw ïa ka Sorkar MDA-I, u President u la ong ba ka seng ka la ïatrei ryngkat met bad mynsiem bad kiwei-kiwei ki seng saiñ pyrthei haduh kaba kut ka samoi treikam.
“Ha kane ka kynti ba mynta ruh, ngi ai ka kular ba ngi kyrshan ïa ka Sorkar halor ka nongrim ban pyntikna ba kan don ka jingskhem ha ka Sorkar khnang ba kata ka Sorkar ka lah ban pyndep la ka kamram,” u la ong.
Haba kylli la kan don ne em ka jingkylla ha ka Sorkar, u Bah Lyngdoh u la ong ba um sngewthuh balei kata ka jingkylli ka mih namar ha u hi, kam don kaba kum kata ka rukom pyrkhat.
“Nga ngeit skhem ba na ka liang jong phi, lehse phi ïohsngew shane-shatai bad phi sa buh kane ka jingkylli…hynrei ba kan long shai, na ka liang jong ngi ha kane ka por, kam don kaei-kaei kaba kum kata ka rukom pyrkhat,” u la ong.
U la bynrap ba kane ka rukom pyrkhat ka long kaba bakla bad ka bym don nongrim bad u ïohi ba kane kan wanrah pynban ïa ka jinghiar arsut jong ka Jylla lada bun ki don ïa kane ka rukom pyrkhat.
“Ka jingjop jong u Bah Synshar Lyngdoh ka long ban pynkhlaiñ ïa ka seng jong ngi bad kumjuh ïa ka MDA, ka Sorkar kaba ngi, ngi don lang. Kata ka long ka thong jong ngi kum ka seng,” u la ong.
Halor ka jingjop donburom u kyrtong ka seng, Bah Synshar Kupar Roy Lyngdoh Thabah ïa u kyrtong ka National People’s Party (NPP) da palat lai hajar ‘vote’, utei u nongïalam u la ong ba ki jingtrei shitom jong baroh ha kane ka jingïalap ilekshon (ba dang shu dep) kim shym la long leh noh ei.
“Ngi ai ka jingïaroh ïa ki paidbah nongshong shnong ka Sohïong konstitwensi kiba la trei shitom met bad mynsiem ban pyntikna ba u kyrtong jong ngi u dei ban jop…ka burom ka leit sha ki,” la ong u Bah Lyngdoh da kaba pynpaw ka jingsngewnguh ïa u Blei u bym shym la ieh noh ïa ka seng kumjuh ïa u kyrtong ha kane ka ilekshon.
Haba kdew ba ki paidbah ki la dep rai ban ai ïa ka ‘vote’ halor ki 2 tylli ki nongrim, u President u la ong, “Kawei ka long halor ka jingsngewlem ïa i Bah H.D.R. Lyngdoh (Bam Kwai ha Dwar U Blei) ïa kiei-kiei baroh kiba ma i, i la trei ha ki snem ba i la long kum u MLA wat ha ka por ba im shym long kum u MLA. Kaba ar ka long ba halor kita ki kam kiba i la leh bha, ki paidbah ki ai ka jingsngewlem ban siew kylliang pat ïa i Bah H.D.R. lyngba u kyrtong jong ngi, u Bah Synshar Lyngdoh ha kane ka ilekshon da kaba ai ïa ka ‘vote’.”
Shuh shuh haba pynsngew ba u kyrtong ka seng u la ïoh ïa ka jingieid bad jingshaniah na ki paidbah ka konstitwensi, u la ong ba ki paidbah ruh ki khmih lynti ba ynda u la jop, un leh ïa kaba bha tam na bynta jong ki.
