Ka jingmih na ka ilekshon sha ka ïingdorbar Thawaiñ na Sohïong konstitwensi ha kaba ka jingñiew ‘vote’ ka la long ha ka 13 tarik Jymmang, 2023, ka pyni biang sa shisien ïa ka jingshisha ba kham bun na ki paid Khasi ki la ngiah bad isih hi shoiñ ïa ka seng National People’s Party (NPP). Ban shu pynkynmaw, u kyrtong ka seng United Democratic Party (UDP) ha ka ilekshon ha Sohïong konstitwensi, u Bah Synshar Kupar Roy Lyngdoh Thabah u la long u nongjop bad un long u MLA bathymmai da kaba ïoh khur haduh 16,679 ‘vote’ katba u kyrtong uba wan ba-ar u dei jong ka NPP, kata, u Bah Samlin Malngiang uba la ïoh 13,257 ‘vote’. Ka ‘vote’ baroh kaba la ñiew ka long 32,161 ‘vote’. Ka jingjop u kyrtong ka UDP da haduh 3,422 ‘vote’ kam dei shuh tang ka jingjop badonburom, ka la dei ruh ka jingjop kput kaba pyni shai ba ki paidbah Sohïong kim mon satia ïa ka NPP wat lada ki lah ban ym don daw eiei pyrshah ïa u Bah Samlin. Ki don kiba la kynthoh ba lada u Bah Samlin u la neh beit ha ka seng Hill State People’s Democratic Party (HSPDP), lehse ki paidbah ka Sohïong kin dang ai biang ha u ïa ka iktiar ban long kum u MLA jong ki. Tangba kata kam don jingmut shuh ban dang ïathir namar ka kam ka la dep bad ki paidbah Sohïong ki la ïoh ïa u MLA bathymmai.
Ka NPP ka la sei lut ïa ki nongïalam jong ka – naduh u Myntri Rangbah, Conrad K Sangma, u Symbud Myntri Rangbah, Bah Prestone Tynsong, ki Myntri sorkar, MLA bad MDC nalor kiwei pat – ban leit ñiom sha Sohïong bad ban padiah ïa u thylliej na ka bynta u Bah Samlin. Ki la ïa pynlut sngi ban ïalap na ki rynsan bapher-bapher ryngkat bad ka jingshad jingkmen bad ki paidbah nongkyrshan. Ha kajuh ka rukom, ka UDP ka la leh kumne watla uba la kham pawnam bha ha ka rukom ïalap ilekshon u dei u Bah Amazing Kurbah. Tangba ha kaba kut, ki paidbah ki la kham noh sha u Bah Synshar. Ka jingkren kob jong ki nongïalam ka NPP ba ki bat ma ki ïa u shabi jong ka Secretariat ka la pynlong pynban ïa ki paidbah ka Sohïong ba kin khang tala syndon ïa kane ka seng ha kane ka ilekshon. Ki jingkren kiba laiphew jait laiphew skit ki la mih na ka shyntur jong ki nongïalap ilekshon khamtam na ka liang ka NPP. Ka jingkob kaba ha khmut haduh ba la sngewthait sa ban sngap. Kam myntoi pat ban kob ha ka ilekshon namar ka bor ka shong ha ki paidbah ba bun ba lang bad ym tang ha kita ki nongïalam kiba don tang shi kham. Kiba bun ki nongïalam kim tip bad kim sngewthuh hi ruh aiu ki paidbah ki rai tat haduh ban da la plie lut ïa ki kor thep ‘vote’ ha ka sngi ñiew.
Na Rilum Khasi Jaiñtia, ka NPP ka la jop phra ngut ki MLA, hynrei da ka jingwan pynïasoh noh jong ki arngut ki MLA ka People’s Democratic Front (PDF), ka jingdon kita ki MLA na kane ka thaiñ ka la kiew sha ka 10 ngut. Ïa kine ki MLA la phah ban rung sha ka NPP ha ka 6 tarik Jymmang, 2023 kaba long saw sngi shwa ba ki paidbah ka Sohïong kin jied ïa la u MLA. Ka NPP ka dang tharai ba ka jingwan pynïasoh jong kine ki MLA ka PDF kan rah ïa ka burom bad ka kyrteng jong ka seng ha Sohïong bad kan long kum ka lad ban khroh shuh ïa ki paidbah. Phewse kam shym la long kumta. Mano ba kham stad haba kumta? Ki paidbah ka Sohïong konstitwensi lane kita ki MLA ka NPP? Ka jubab jong ki paidbah Sohïong ka dei kaba la pynshaïong hi ngaiñ ïa ki nongïalam bad nongkyrshan ka NPP. Ki khlem poi pyrkhat ba ki paidbah kin ai da kato ka jubab da kaba pynjop kput ïa u kyrtong ka UDP uba dei ruh u pyrsa trai jong u MLA ba la khlad noh, u Bah H Donkupar Roy Lyngdoh. Katto ki la ïakhun ban jop khnang ban pynkiew ïa ka jingbun ki MLA na ka 28 ngut sha ka 29 ngut, hynrei ki nongshong shnong ka Sohïong ki la pyni ïa la ka bor.
Ha kawei pat ka liang, ki la don kiba kynthoh ba ka jingpynjop ïa u kyrtong ka UDP na Sohïong kam don jingmut eiei namar ha kaba kut, ka UDP bad ka NPP ki ïatreilang. Kane ruh ka dei ka jingshisha. Kumba ka long mynta, kam i don lad ïa ka UDP ba kan leh eiei ban thaw sorkar thymmai wat lada ka don 12 ngut ki MLA. Ka jingphohsniew jong ka UDP ban ïoh ïalam ïa ka sorkar lehse ka la kut noh khamtam hadien ba ki arngut ki MLA ka PDF ki la leit rung sha ka NPP. U Bah Prestone u la ong ha ka por ïalap ilekshon ha Sohïong ba sa tang katno, yn pynïaid noh da ka kjat ïa ki MLA ka UDP kiba mynta ki hap ban shong ha ka tnum jong ka bos ba la ñiah da ka NPP. Ka jingmut jong kata ka jingpynïaid kjat lehse ka long ba ki arngut ki MLA ka UDP kiba don ha ka kynhun Myntri ki la ban shah weng noh lane ka NPP kan pynkut noh shi syndon ïa ka jingïatreilang bad ka UDP bad ki 12 ngut ki MLA jong kane ka seng kin hap ban shong noh sha ka Liang Pyrshah. Tangba ngim tharai ba kan long kumta namar ka NPP kan ym kwah da lei-lei ba ka Liang Pyrshah kan khlaiñ. Lada khlaiñ ka Liang Pyrshah, ka sorkar kan sa ktha khlieh bad kin sa mih bun kiei-kiei. Ïa mynta, lehse ka NPP kan pynshong beit ha tnum bos ïa kita ki 12 ngut ki MLA ka UDP bad kan sa kheiñ bad peit thuh bha hashwa ba kan shim ïa kano-kano ka sienjam pyrshah ïa kane ka seng kaba la shu wan snoh ha ka minit ba khatduh sha ka sorkar Meghalaya Democratic Alliance (MDA) 2.0. watla katta ruh, ngin peit ha kine ki sngi ha kano ka rukom u Bah Prestone un pynïaid da kjat ïa ki 12 ngut ki MLA ka UDP.
