Jowai, Jymmang 14:
Ka Dorbar Shnong Khanduli bad ki nongshong shnong jong ka kim shym la thang dusmon ïa kano kano ka ïing trep ïing skum jongno-jongno haduh mynta bad ki bor ka aiñ ki dei ban pynlong ïa ka jingtohkit kaba bniah bha ban lap mano ba la thang ïa ki ïing trep ïing skum ha kine ki khyndiat sngi.
Kane ka long ka jingpynshai halor ki jingkynnoh ba la mih na ki Karbi ba ki nong Khanduli ki la thang ïa ki ïing trep ha ki lyngkha ha kine khyndiat sngi.
U Assistant Waheh Shnong ka Khanduli, u Bah K. Bina, ha ka Sngi U Blei u la ong ka jinghuri hura ha Khanduli ka mih na ka daw ba ka Karbi Anglong Autonomous Council (KAAC) ka la wan sieh khyrdop (‘check point’) hapoh u pud u sam jong ka Dorbar Shnong Khanduli khlem ka jingtip bad ïoh jingbit na ka Dorbar Shnong.
Ka Dorbar Shnong Khanduli ka la ujor tang ïa ka jingwan sieh khyrdop ka KAAC, hynrei ka la mih pynban shibun ki jingkynnoh pyrshah ïa ki nong Khanduli da ki nong Karbi.
U la pynshai ba ka shnong Lengkreng ka jngai bha na ka shnong Khanduli bad ka shim por kumba lai kynta ïa ki nong Khanduli ban poi sha katei ka shnong. Kumba ka long mynta wat tang ban leit rep leit riang ruh ki nong Khanduli kim ïoh lad namar ba la shah khang ha ki nong Karbi. Namarkata, u la ong ha kano ka dur ki nong Karbi ki kynnoh ba dei ki nong Khanduli ba thang ïa kata ka ïing ha Lengkreng.
U Bah Bina u la ïathuh ba mar sien ïoh jingtip halor katei ka jingkynnoh, mar-mar u la phone ïa ki Karbi kiba don ha ka shnong Lengkreng ban wad ïa uta u nong Khanduli uba donkti ban thang ïa kata ka ïing kumba ki kynnoh bad ban ai jingtip sha ka Dorbar Shnong bad ka Dorbar Shnong Khanduli ka kular ba uno uno u nong Khanduli uba leh ïa kum kane ka jait kam yn pynshitom ïa u.
Ym tang kata, u la ong ba ki nong Karbi ki kynnoh ba ïa ki saw tylli ki ïing trep ba don ha ki lyngkha rep, la thang hi da ki nong Khanduli bad u la pynshai ba kumno ki nong Khanduli kin thang ïa ki trep lajong.
U Waheh Shnong ka Khanduli, u Bah Yooshida Nongspung, u la pynshai ba na ka thaiñ Artiang Sanphaw, Langkyrja, Khiehmulong, Mynkoiram, Rymphum bad Lyngkreng ym ju don kano kano ka jingïakajia jingkynad hynrei ka don tang ka jingieid kylliang iwei ïa iwei.
U la ong ka jingïakajia kaba man la ki por ka dei beit tang bad ka shnong Myn-i bad ka Umpawiang namar kine ki artylli ki shnong ki khanglad ïa ki nong Khanduli ban leit rep leit sha ki pynthor jong ki nong Khanduli kiba hap ha ki shnong ba shong ba sah da ki Karbi.
