Shillong, Jymmang 14:
Ka jingai por ba 48 kynta jong ka Voice of the People Party (VPP) ban pynsangeh ïa ki jingthung kam ha ki tnat treikam Sorkar bapher-bapher ka la kut noh ha ka Sngi U Blei.
Kum ban shu kdew hangne, hadien ba la kut ka jingïakynduh lang jong ka seng kaba la long ha ka Sngi Thohdieng ha jaka pynïeng kali hajan Additional Secretariat, ki nongïalam ba kynthup ïa u General Secretary, Dr. Ricky A. Syngkon bad Vice-President, Dr. Kara H. Chen ki la leit ban aiti da ka dorkhas sha ka Sorkar halor ka jingdawa ban pynsangeh noh ïa ka jingpynrung kam katba ym pat pynbeit ïa ka ‘Roster System’ bad ka ‘Reservation Policy’.
Ïa katei ka shithi la aiti ha u Symbud Myntri Rangbah ka Jylla, Bah Sniawbhalang Dhar ban pynpoi sha u Myntri Rangbah ka Jylla, u Conrad K. Sangma namar ba u Myntri Rangbah um don ha nongbah.
Katei ka jingleit ai dorkhas jong ka seng ka long ban dawa na ka Sorkar ba ka dei ban pynsangeh shuwa ïa ka jingthung kam thung jam ha ki tnat treikam Sorkar bapher-bapher bad ka seng ka la buh por 48 kynta ba ka Sorkar ka dei ban pynsangeh ïa kane da kaba pynmih ïa ka jingpynbna, lym kumta, ka seng kan sa pynbna da ki jingïakhih bapher-bapher.
Hadien ba ki nongkitkam ka seng ki la wan ban aiti ïa katei ka dorkhas, na ka liang u President, u Bah Ardent M. Basaïawmoit haba ai jingkren u la ong ba ka seng kan sa shu pynkhreh beit ïa ka jingkut jong kata ka 48 kynta bad lada ka Sorkar kam kwah ban pyllait ïa ka jingthoh ban pynsangeh ïa ka jingthung kam thung jam, ka seng kan hap ban pynkhreh da ki jingïakhih.
