Yazali, Jymmang:
U Lat jong ka jylla Arunchal Pradesh, u KT Parnaik ha ki khyndiat sngi kiba la leit noh u la ong ba ka jylla Arunachal Pradesh ka dei ka jylla kaba riewspah ha ka liang ki kam rep kam riang (rep jhur bad soh), bad kumjuh ruh ha ki kam jngoh kai pyrthei bad ki nongshong shnong ka jylla ki dei ban phai khmat sha kitei ki lad treikam na ka bynta ka roi ka par bad ka ïoh ka kot ka jong ki bad kumjuh ruh na ka bynta ka jylla hi baroh kawei.
U Lat jong ka jylla u ba leit ban jngoh ïa ka thaiñ Lower Subansiri district na ka bynta ar sngi u la long ba ka Sorkar Pdeng ka la shim ïa ki sienjam kiba kyrpang na ka bynta ban kyntiew ïa ka Thaiñ Shatei Lam Mihngi jong ka ri India, khamtam na ka bynta ka jylla Arunachal Pradesh.
Ha ka jingleit jngoh ïa ka thaiñ, na ka liang u Lat ka jylla u la pyntip ba ka Sorkar Pdeng ka la don hapdeng ka jingpynkhreh ban pyntrei kam ïa bun tylli ki kam pynroi bad ki projek bapher bapher ha ki khyndiat snem ki ban sa wan. Na ka liang u Lat u la kyntu ïa ki paidbah nongshong shnong ba kin ïatrei lang bad ka sorkar jylla khnang ba yn lah ban pyndep ïa kitei ki kam pynroi ha ka por kaba biang.
Ha ka jingleit jngoh ïa ka thaiñ Lower Subansiri, na ka liang u Lat ka jylla u la ïoh ruh ïa ka lad ban pynlong ïa ki jingïalang syllok bad ki paidbah nongshong shnong jong ka thaiñ Yazi bad kiwei kiwei ki shnong kiba marjan.
Ha ka sngi ba u Lat ka jylla u la leit jngoh ïa ka thaiñ ha ryngkat ka lok jong u – Anagha Parnaik were la pdiang burom ïa ki da ki heh sorkar, ki paidbah nongshong shnong bad kumjuh ruh da ki kynhun kaitor hapoh ka jingïalam jong u MLA ka thaiñ – Taba Tedir u ba dei ruh u Myntri ka Tnat Pule Puthi jong ka jylla.
Ha ka jingleit jngoh ïa ka thaiñ, na ka liang u Lat lem bad ka lok jong u ki la leit ruh ban ïashim bynta ha ka rynsan thung dieng ha Potin view point.
