Islamabad, Jymmang:
Hadien 3 sngi ba la khang bad pynsangeh treikam ia ka ‘Internet’ hapoh Pakistan, ka Pakistan Telecommunication Authority (PTA) ha ka Sngi Thohdien ka la pynbna ba la pyllait bad pyntreikam biang ia ka internet ha kylleng ki bynta jong ka ri.
Kumta, la ong ba baroh ki rynsan Social Media naduh ki Face, Twitter bad ka YouTube ruh ki la lah ban treikam kumba ju long hadien ba la pyllait noh ia ki baroh.
Katei ka tnat PTA ka la khang noh ia ka Internet bad kumjuh ruh wat ia ki kor internet Broadband ha baroh ki bynta jong ka ri ha ka 9 tarik u Jymmang, hadien ka jingbthah jong ka tnat kam poh iing ka Pakistan.
La ong ba ia ka Internet la khang noh naduh ba jur ka jingiakhih paidbah jong ki nongkyrshan u Imran Khan ha kylleng ki bynta jong ka ri Pakistan, ha kaba ki la leit thombor bad pyn julor ruh ia ki jaka treikam bad ki ophis treikam jong ka sorkar ha Lahore, Rawalpindi bad ha Peshawar.
Namarkata, ki bor pyniaid ka Pakistan ki la khang noh shwa shipor ia ki kor internet baroh naduh ki rynsan Social Media bapher, khnang ban tehlakam shwa shipor ia ka ding kaba klang bad ban lait pynpur ia kane sha kiwei pat ki bynta jong ka ri.
