Dimapur, Jymmang:
Kat kum ki jinglum jingtip jong ka Indian Public Health System (IPHS), la shem ba ka jylla Nagaland ka la ïakynduh ïa ki jingeh na ka daw jong ka jingduna ha ka liang ka jingdon jong nos watla ka jylla ka don ïa bun tylli ki ‘health centre.’ Da kaba ai jingkren halor katei ka mat ha ka rynsan ba la rakhe ïa ka “International Nurse’s Day” ha ka jingïalang kaba la pynlong ha Naga Hospital Authority Kohima (NHAK) ha ka Sngi Thohdieng ba la dep, na ka liang u Commissioner & Secretary ka Tnat Koit Khiah jong ka jylla Y Kikheto Sema u la pyntip ba ha ka jylla Nagaland ki don tang kumba 952 ngut ki ‘staff nurse’ bad 845 ngut ki ‘auxiliary nurse’ & ‘midwives’ (1797 ngut baroh).
Haba ai jingkren ha katei ka rynsan, na ka liang u Sema u la ban khia ruh halor ka mat kaba ïadei bad ka jingdonkam ban pynbun ïa ki nos shynrang ki ban lah ban sumar ïa ki nongpang shynrang khamtam ha ki kamra sumar Intensive Care Unit. U la pyntip ba ha ka jylla Nagaland ki don tang 21 ngut ki ‘staff nurse’ kiba dei ki nos shynrang.
U Sema u la pyntip shuh shuh ba sa kawei ka jingeh ba ka jylla Nagaland ka ïakynduh ka dei ha ka tnat koit khiah jong ka jylla, ha kaba 40% ki nongtrei ki dei kiba trei ïa ki kam ‘technical post’ bad 60% pat ki nongtrei kiba trei ïa ki kam ‘non-technical post’.
Ha ka jingïalang, na ka liang u Sema u la pyntip shuh shuh ba na ka liang ka Sorkar India ka la ai ruh ïa ka jingmynjur na ka bynta ban kyntiew kyrdan bad pynbha ïa ka School of Nursing ha NHAK sha ka Nursing College.
Na ka liang ka jong u, u la pynpaw ïa ka jingkyrmen kaba khraw ba ïa ka ‘nursing college’ kaba nyngkong eh ha ka jylla yn sa lah ban pynsdang noh shen. U la ai ïa ka jingïaroh kaba khraw ïa ki nos jong ka jylla kiba la lah ban trei janai ïa ki kam ki jong ki, khamtam ha ka por jong ka jingsaphriang jong ka jingpang COVID-19.
Ha ka jingai jingkren jong u, u la pyntip ruh ba ka kam ba ki nos ka jylla ki trei ka dei kawei na ki kam ai jingshakri kaba janai bad kyrpang tam, watla bun na kitei ki nos ki ju ïakynduh ïa ki jingeh bad ki dieng pyngkiang kiba bun jait ha ki lad treikam jong ki.
Ha katei ka sngi la ïoh ruh ïa ka jingkren na ka Tiakala Longkumer, principal, School of Nursing, kaba la ai ïa ka jingkhublei bad jingsngewnguh kaba kyrpang ïa ki nos jong ka jylla kiba la lah ban bah ïa ki lyngkor na ka bynta ban pynbiang ïa ki lad jingsumar kiba paka na ka bynta ki paidbah nongshong shnong jong ka jylla.
