Shillong, Jymmang 14:
Ka Sorkar Jylla kan sdang ban ïa phylliew jingmut mynta ka taïew halor ka ‘Roster System’.
Ka tyllong khubor ka la ïathuh ba ka Sorkar kan sdang shwa da ka jingbatai bniah (presentation) shaphang ka ‘Roster System’ ha kaba ka lah ban dei ka jingbatai ïa ka Kynhun Myntri.
La ong ba hadien kane yn bud sa ka jingïalang jong ki MLA ka Meghalaya Democratic Alliance (MDA-II) bad kan bud sa ka jingïakynduh jong baroh ki seng saiñ pyrthei.
Kum ban pynkynmaw, ka Meghalaya High Court lyngba ki ar ngut ki nongbishar, u Chief Justice Sanjib Banerjee bad u Justice Wanlura Diengdoh ka la pynmih ïa ka jingbthah ha ka 5 tarik Ïaïong, 2022 ha kaba ka la bthah ban pynsangeh shwa ïa baroh ki jingpynrung kam halor ka nongrim ba ha ka por ba khot ban thep kam, ki tnat Sorkar bad kiwei kiwei ki shnat treikam kiba hap ban bud ïa ka bhah thung kam ne ‘Reservation Policy,’ ki khlem pyni satia ïa ka ‘Roster System’ lane kim pyni shai ïa ka rukom mang ne rukom kheiñ ïa ki kam na ka bynta ki jaitbynriew bapher bapher katkum ka ‘Reservation Policy’ lane ka jingbhah lypa ïa ki kam katkum ka ‘Reservation Policy’ ha ka por ba khot ban thep kam.
Ka jingpynsangeh ban thung kam ha ki tnat treikam ka Sorkar ka la ktah bha ïa ka rukom treikam ka Sorkar bad ka ktah ruh ïa ki phew hajar ngut ki nongwad kam Sorkar kiba la jan kut ka rta ban thep kam.
Lada ka Sorkar ka dang pynsangeh shuh shuh ïa ka jingthung kam kumba la dawa tat haduh ban da pynbeit biang ïa ka Reservation Policy, ka la nang jur ka jingshah ktah ïa ki samla kiba wad kam khamtam eh kiba la kut artad ka rta ban wad kam Sorkar.
